Ерөнхийлөгчийн санаачилгаар Төрийн ордонд “Цар тахлын үеийн эдийн засгийн сэргэлтийг эрчимжүүлэх нь” сэдэвт төр, хувийн хэвшил, хөрөнгө оруулагчдын зөвлөлдөх уулзалт болж байгаа билээ. Энэ үеэр салбар салбарын төлөөлөл өөрсдөд тулгамдаж байгаа асуудлаа танилцуулж байгаа юм. Улмаар Эмийн холбооноос АРБИДОЛ эмийг ковидын эмчилгээнээс хассан асуудлыг буруушааж байгаагаа илэрхийллээ. 

Тодруулбал, Арбидол эмийг короновирусний эмчилгээнээс хассан тохиолдолд энэ эм хог болно. Гэтэл энэ эмийн нөөцийг бүрдүүлэхэд 10 тэрбум төгрөг зарцуулсан. Мөн арбидолыг эмчилгээнээс хассан шийдвэрийг ЭМЯ, Хүний эмийн зөвлөл гэх мэт эрүүл мэндийн байгууллагууд нь мэдээгүй байна. Одоогоор 3.9 тэрбум төгрөгийн арбидолыг татан аваад байна. Мөн их хэмжээний татан авалт хийхээр гэрээ хийсэн байгаа. Импортын эм Замын-Үүдэд ихээхэн саатаж байна. Тиймээс тусгай коридор үүсгэн, эм, эмнэлгийн хэрэгслийг гаалиар хурдан оруулах шаардлагатай байна. Түүнчлэн тээврийн зардал 3-5 дахин өссөн. Ковидын нөхцөл байдлыг харгалзан эм ханган нийлүүлэгчдэд хүүгүй зээл өгөхийг хүсч байна гэсэн юм.

Харин уг асуудалд Эрүүл мэндийн сайд С.Энхболд тайлбар хийлээ. Тэрээр “Арбидол эмийг коронавирусийн халдварын эмчилгээнээс хасаагүй. Зөвхөн өвөрмөц эмчилгээний удирдамжаас хассан байгаа. Мөн ДЭМБ-аас коронавирусийн халдварын эмчилгээг байнга өөрчилдөг. Манай улс ч ДЭМБ болон Европын холбоо, Ази, Номхон далайн орнуудын оношлогоо, эмчилгээний удирдамжийг судалж, өөрийн оронд тохирсон удирдамжийг тухай бүрт нь шинэчилж байгаа" гэлээ.

Зөвлөлдөх уулзалт үргэлжилж байна.