Эрүүл мэндийн яамнаас баасан гараг бүр хийдэг коронавируст халдварын нөхцөл байдлын талаарх ээлжит мэдээллээ хийж байна. Энэ үеэр доктор А.Амбасэлмаа иргэдэд хандаж дараах сэрэмжлүүлэг мэдээллийг өгсөн юм.  

Тэрээр "Дэлхий нийт ковидын цар тахалтай нүүр тулаад 20 гаруй сарыг ардаа үдэж байна. Бид цар тахлын бүх үе шатыг дамжиж одоо 4-р үе шат буюу бүх нийтийг хамарсан дэгдэлтийн үетэй нтулгараад байна. Саяхан ДЭМБ-ын Номхон далайн баруун болон зүүн бүсийн орнуудын хамтарсан чуулга уулзалт боллоо. Энд 40 гаруй улс оролцсон. Цахим уулзалтаар улс орон бүр өөрийн цар тахалтай тэмцэх талаар зохион байгуулж буй арга хэмжээ, ололттой талууд, туршлагаа ярих болон цаашид анхаарах асуудлаа ярилцсан. Энэ уулзалтад манай улсын хувьд мөн тодорхой хэмжээний туршлагаа ярьж, цаашид хэрхэх талаар ярилцлаа.

Цар тахлын халдвар судлалын нөхцөл байдал ямар байгаа талаар ярилцахад энэ вирус ирээдүйд устах магадлал байхгүй. Магадгүй улс орон бүрийн өнцөг булан бүрд тархах эрсдэл байна гэж үзсэн. Хоёрдугаарт халдварын тохиолдлын тоо, тархалт, өвчлөл их байгаа учраас халдварын үүсгэгч вирус хувиралд орох, хувилбарууд нь өмнөх вирусээс илүү хоруу чанартай байх нөхцөл байгаа тул бүгд вирустэй яаж тэмцэх талаар бэлэн бай. Өмнө хэрэгжүүлж байсан өмнөх туршлагаа хэрэгжүүлж, арвижуулах талаар зөвлөсөн.

Коронавируст халдвар нутагшмал байдалтай болох эрсдэлтэй байна. Тиймээс урьдчилан сэргийлэх хариу арга хэмжээгээ хэчнээн сайн авч чадна, төдий чинээ вирустэй хамтран амьдрах болно. Вакциндаа хамрагдах нь чухал. Нөгөө талаар урьдчилан сэргийлэх арга хэмжээгээ хэрэгжүүлэх хэрэгтэй. 

Цоо шинэ вирусийн хувилбар гарч ирээд цар тахал хэлбэрээр дэгдэх эрсдэл бий. Бид бэлэн байдлаа хангавал дараа дараагийн цар тахлыг хохирол багатай давна. Тиймээс иргэд тэр нь сайн, энэ нь сайн гэхээс илүүтэй вакциндаа хамрагдах нь чухал байна" гэлээ.