Солонгосын  “BTS” хамтлаг ирэх сарын 24-нд цахим тоглолт зохион байгуулах гэж байгаа талааар тэдний харьяалагддаг “Big Hit” энтертайнментаас мэдэгджээ. Тус хамтлаг өнгөрсөн жил европын болон азийн хэд хэдэн орноор "BTS Map of the Soul Tour" аялан тоглолтоо хийх байсан ч коронавирусний цар тахлын улмаас жил гаруй хойшлогдож эцэстээ цуцлагдаад байсан юм. 

Тиймээс BTS хамтлагийнхан дэлхийн өнцөг булан бүрт байгаа фэнүүдтэйгээ "BTS Permission To Dance On Stage " хэмээх цахим тоглолтоор дамжуулан уулзахаар болсон бөгөөд одоогоор тоглолтын тасалбарын борлуулагдаж эхлэх хуваарийг гаргаагүй байгаа аж. 

Одоогоор “BTS” хамтлагийнхан БНСУ-ын Ерөнхийлөгчийн тусгай төлөөлөгчийн хувиар НҮБ-ын үйл ажиллагаанд оролцохоор АНУ-ын Нью-Йорк хотыг зорьжээ. Тэд Тогтвортой хөгжлийн зорилтын Агшин хэмээх үйл ажиллагааны /Moment/ нээлтийн ёслолд БНСУ-ын Ерөнхийлөгч Мүн Жэ Иний хамтаар оролцохоор болсон байна. 

Сануулахад, Тус хамтлагийг БНСУ-ын Ерөнхийлөгч Мүн Жэ Ин “Ерөнхийлөгчийн ирээдүй хойч үе, соёлын тусгай төлөөлөгч”-өөр мягмар гарагт томилсон юм.