АН-ын дарга М.Тулгат: Өнөөдөр парламентад суудалтай, бүлэгтэй АН бодлогын ул суурьтай, улс төрийн соёлтой сөрөг хүчний үйл ажиллагааг явуулж эхлэх цаг болсон байна. 11-р сарын 5 гэдэг бол бид өөрсдөдөө даалгавар өгч байгаа юм. АН одоо үүсээд байгаа асуудал бол хэдэн хүний эрх ашиг, сонирхлын зөрчилдөөн биш энэ бол сүүлийн 20-оод жил явж ирсэн АН-ын дотоод нөхцөл байдал, дүрмийн шинж чанартай үл ойлголцол юм. Энэ удаагийн эвлэрлийн их хурал бол маш чухал түүхэн үүрэг хариуцлагатай. Ардчилсан нам нэгдэж нягтрах нь нийгмийн захиалга. Намын залуу удирдлагууд намаа нэгтгэхийн төлөө тал бүрээс ярилцан шийдэлд хүрснээр ардчиллын төлөөх хүн бүр нэгдэн нягтарч байна. Монголын ард түмний хүсэл зориг дээр Ардчилсан нам үүсэн бий болсон. Ардчилсан нам нэгдсэнээр эрх баригчдыг шахан шаардаж, ард түмэнд үр өгөөжтэй шийдвэр гаргуулахад нөлөөлж тэдэнд хяналт тавьж байх учиртай гэв. 

АН-ын гишүүн  Э.БАТ-ҮҮЛ: АН Монголын түүхэнд алтан үсгээр бичигдэх нам. Монголын ард түмнийг эрх, эрх чөлөөтэй болгосон түүхэн гавьяатай нам. 2009 онд Ерөнхийлөгчийн зарлиг гарч, АН-ын түүхэн гавьяаг үнэлж хүндэтгэх зорилгоор баатрын цолыг надад өгсөн. Ерөнхийлөгч "Энэ бол чамд өгч байгаа юм биш. АН-ын гавьяаг үнэлж өгч байгаа" гэж хэлсэн. Би энэ тэмдгээ АН-ынхаа туганд зүүж өгье. Эзэнд нь өгье гэж шийдсэн. 

Монгол Улсын баатар Э.Бат-Үүл өөрийн тэмдгээ АН-ын туганд зүүж өглөө. Тэрбээр АН-ыг нэгтгэх, нэг даргатай болгох, эвлэлдэн нэгдэх үйл хэрэгт гар бие оролцож байгаа хоёр даргадаа талархал илэрхийлэв. Мөн 2024 онд АН-ыг ялалтад хүргээрэй гээд Ц.Элбэгдорж, Х.Баттулга, Н.Алтанхуяг, С.Эрдэнэ, М.Энхсайхан, Р.Гончигдорж нарт хандан намдаа ирэхийг уриаллаа. Намаа бүрэн бүтэн болгохын тулд намдаа эргэн ирэхийг ийнхүү  уриалсан юм.