Их Британид ачааны автомашины жолоочийн хомстолд оржээ. Тодруулбал, Европын холбооноос ажилчдаа эргүүлэн татах шийдвэрийг гаргасан байна. Улмаар Их Британи  ажилчдыг явсны дараа "АЧААНЫ МАШИНЫ ЖОЛООЧ" гэх мэт тусгай мэргэшил шаарддаг ажлын байруудыг шууд нөхөх мэргэжилтэй ажиллах хүчгүй болжээ. Ийнхүү ачааны автомашины жолоочийн хомстолд орсноор бараа бүтээгдэхүүний түгээлт тасалдаж иргэд хүнс, бараагаа ихээр худалдан авч, шатахуун нөөцлөхөөр урт дараалал үүсгэсэн байна. 

Иргэд шатахуун их хэмжээгээр нөөцөлсний улмаас баасан гарагт үнэ нь хэвийн түвшнээс 180 хувиар өсчээ. Тиймээс үүсээд байгаа нөхцөл байдалтай холбогдуулан тус улсын Ерөнхий сайд Борис Жонсон олон зуун цэргийг дайчлахаар төлөвлөж байгаа талаар The NewYorkTimes мэдээлсэн байна.

Ингэхдээ тэрээр  цэргүүдийг ачааны тэрэг жолоодуулах бөгөөд ингэснээр ачааллыг багасгахад ихээхэн дэм болно хэмээн үзсэн аж. Мөн тус улсын Засгийн газрын хувьд эрчим хүчний салбарынхныг 1998 онд батлагдсан Өрсөлдөөний тухай хуулиас түр чөлөөлөхөөр болсон байна. Ингэснээр компаниуд өөр хоорондоо мэдээлэл солилцож, эрэлт хамгийн их байгаа бүс нутгуудыг эн тэргүүнд тавихыг зөвшөөрчээ.

Их Британид ойролцоогоор 8000 шатахуун түгээх станц байдгийн дийлэнхийг бие даан үйл ажиллагаа явуулдаг жижиглэн худалдаачид эзэмшдэг бөгөөд бие даан үйл ажиллагаа явуулдаг станцуудын 50-85 хувийнх нь нөөц дууссан байна. 

Мөн ерөнхий сайд Борис Жонсон гадаадын олон мянган жолоочид виз олгохоор шийдвэр гаргажээ. Ингэснээр үүсээд байгаа нөхцөл байдлыг аажмаар намдаах боломжтой аж.   

эх сурвалж: www.nytimes.com