Тулгар төрийн байгуулагдсаны 2230, Их монгол улсын 815 жил, Ардын хувьсгалын 100 жилийн ойг тохиолдуулан зарим гэмт хэрэг, зөрчил үйлдсэн хүн, хуулийн этгээдийг эрүүгийн хариуцлага, зөрчлийн шийтгэлээс нэг удаа өршөөн хэлтрүүлэх өршөөл үзүүлэх тухай хуулийг УИХ батлан гаргасан. 

Уг хуульд зааснаар 2017 оны долдугаар сарын 1-ний өдрөөс 2021 оны зургаадугаар сарын 24-ний өдрийн 00:00 цагаас өмнө Зөрчлийн тухай хуулийн 14.7 дугаар зүйлийг зөрчсөн хүн 2021 оны аравдугаар сарын 1-ний өдрөөс өмнө торгох шийтгэлийн төлбөрийн 50 хувийг төлсөн бол үлдсэн хувийг өршөөн чөлөөлөхөөр болсон юм. 

Торгуулийнхаа талыг нь төлөх боломжтой сүүлийн өдөр ойртож байгаатай холбогдуулан иргэд торгуулиа төлөх гэж олноор smartcar.mn болон  torguuli.police.gov.mn сайтад хандсанаар ачаалал үүсч тус сайт хэт удаашралтай ажиллах болжээ. Улмаар нэг цэгийн гэх тодотголтой газруудад урт дараалал үүсээд байна.  

Угтаа бол иргэн та заавал өөрийн биеэр очиж торгуулийнхаа 50 хувийг төлөх албагүй бөгөөд цахимаар эсвэл Гэрэгэ систмемийн машинаар торгуулийнхаа 50 хувийг төлөх боломжтой юм.

Түүнчлэн жолооч та бүхэн торгуулиа цахимаар төлөх бол хамгийн түрүүнд жолооч нар жолооны үнэмлэх дээрх торгууль, камерын хяналтаар ногдуулсан торгуулийг өөр өөр дансанд тусдаа төлнө гэдгийг анхаараарай.