Ковид 19 цар тахал дэгдэж эхэлсэн цаг үеэс одоог хүртэл УИХ, Засгийн газрын үйл ажиллагааг сурвалжлах сэтгүүлчдийн эрх хумигдаж эхэлсэн. Хоёр жил гаруй хугацаанд энэ байдал үргэлжилж байгаа бөгөөд УИХ, Засгийн газраас бэлтгэсэн, тусгайлан зассан тайз, мэдээллийг дамжуулах болсон. Улмаар иргэдийн мэдэх эрх ноцтой зөрчигдөж байгаа учраас "Сэтгүүлчид Төрийн ордонд чөлөөтэй нэвтэрч, иргэдийн мэдэх эрхийн төлөө ажиллах боломжгүй байна" хэмээн акц зохион байгуулсан.

Тэгвэл акцыг УИХ-ын нэр бүхий гишүүд дэмжиж эхэллээ. Тодруулбал...

УИХ-ын гишүүн Б.Энхбаяр: "Төрийн ордон сэтгүүлчдэд “Хаалгаа нээх” шаардлагыг дэмжиж байна. Ард түмний төлөөллийн байгууллага хүнийсгэгдэж буй нь нууц биш. Ил тод, нээлттэй, ардчилсан байх зарчим нь иргэдийн мэдэх эрхийг чөлөөтэй, элдэв хориг хязгаарлалт тавихгүй байж л амилна. УИХ-ын гишүүд ч бэлдсэн тайз, товлогдсон асуултанд л дасах нь өөрсдөд нь л муу" хэмээн нийтэлжээ.

УИХ-ын гишүүн Ж.Сүхбаатар: Парламынтын гишүүдтэй амьд мэдээллийн харилцаа үүсгэх зорилготой сэтгүүлчдийн шаардлагыг УИХ хэсэгчлэн хүлээн авахыг дэмжинэ. Өдрөөр эсхүл тодорхой цагаар зохицуулж чөлөөтэй ажиллах боломж олгож болно шүү дээ. Басхүү УИХ-ын гишүүдийн ажил хэвийн явагдах нөхцөл талыг ч харгалзах…гэжээ. 

УИХ-ын гишүүн М.Оюунчимэг: Би сэтгүүлч мэргэжилтэй. Тиймээс ёсзүйтэй, хариуцлагатай сэтгүүлзүйг дэмждэг. Төрийн үйл ажиллагааг сэтгүүлчдэд чөлөөлтэй сурвалжлах боломж олгох, Үндсэн хуульд заасан иргэдийн мэдэх эрхийг хангах шаардлагыг дэмжиж байна. 

УИХ-ын гишүүн Ц.Мөнхцэцэг: Хүний эрхийн түгээмэл тунхаглалын 19-р зүйлд “…мэдээллийг улсын хилийн заагаар үл хязгаарлан аливаа арга замаар эрж сурвалжлах, хүлээж авах, түгээн дэлгэрүүлэх эрх чөлөө”-г зааж өгснийг Монгол Улс нэгдэн орсон улсын хувьд дагах ёстой.