“Цагдаагийн алба хаагчдын эрх ашгийг хамгаалах холбоо”-ноос цаг үеийн асуудлаар мэдээлэл хийлээ.  

“Цагдаагийн алба хаагчдын эрх ашгийг хамгаалах холбоо”-ны тэргүүн Н.Алтанбаатар: Төрийн чиг үүрэг бүхий хууль сахиулж байгаа цагдаагийн байгууллага, цагдаагийн алба хаагчдын үйл ажиллагааг турхирч, нийгэмд буруу ойлголт өгч байгаад харамсаж байна. Танхай этгээд цагдаагийн алба хаагчийн хууль ёсны шаардлагыг биелүүлэхгүй биед нь халдаж байгаа тохиолдолд цагдаа албадлагын арга хэмжээ авна. Гэтэл өөрийн танхайрсан үйлдлээ хамгаалахын тулд гэмгүй, үзэл болоо илэрхийлж байсан энгийн иргэнийг саатуулсан мэтээр буруу ойлголт төрүүлж байна. Танхай этгээдүүд цагдаа нар руу дайрах нь хэрээс хэтэрч байна.  

Монгол Улс хууль эрх зүйтэй улс. Нэг танхай иргэний гаргасан үйлдлийн төлөө хэсэг нөхөд Хууль зүйн яамны гадна суллахгүй бол явахгүй гээд жагсаж байгаа юм бол өнөөдөр монголд танхайрч байгаа бүх хүний төлөө жагсаад явах хэрэг үү. Та бүхэнд үзүүлсэн бичлэгт бодит үнэн байна. 

Буруутай нэгнийг зөвтгөж цагдаа нар руу битгий дайр. Тэд ч гэсэн адилхан хүн. Цар тахлын үед гэр орноо орхиод ард түмний төлөө ажиллаж байгаа хүмүүс. 

Гарсан үйлдэл болгонд цагдаагийн байгууллага тайлбар хийгээд байх шаардлагагүй. Хэцүү нөхцөлд ажилладаг цагдаа нартай иргэд та бүхэн зөв, соёлтой харилцаж байхыг хүсч байна" гэлээ.