Монгол Улсын дээд шүүхийн нийт шүүгчийн хуралдаанаар Дашбалбарын Гангабаатарыг Үндсэн хуулийн цэцийн гишүүнд нэрийг нь дэвшүүлж, Монгол Улсын Их Хуралд санал болгохоор тогтсон. Улмаар өнөөдөр УИХ-ын чуулганы хуралдаанаар Монгол Улсын дээд шүүхээс санал болгосон Үндсэн хуулийн цэцийн гишүүнийг томилох тухай асуудлыг хэлэлцэж Дашбалбарын Гангабаатарыг Үндсэн хуулийн цэцийн гишүүнээр томиллоо.

Чуулганы хуралдааны үеэр УИХ-ын гишүүн Ж.Сүхбаатар, Л.Мөнхбаатар, Б.Энхбаяр нар ҮХЦ-ийн гишүүнээр улс төрийн өндөр мэргэшилтэй хүнийг томилно гэсэн заалтыг эргэж харах хэрэгтэй гэсэн санал хэлж байлаа. Тодруулбал, аль нэг намын даргаар, эсхүл төрийн байгууллагад цөөн жил хуулийн хэлтэст нь ажилласан албан тушаалтныг улс төрийн өндөр мэргэшилтэй гэж тодорхойлох нь өрөөсгөл. Тиймээс улс төрийн өндөр мэргэшилтэй гэж улс төрийн ямар албанд ажиллаж байсан, хэдэн жил хашсан, ямар бүтээл туурвилтай хүнийг хэлэх вэ гэдгийг тодорхойлох шаардлагатай гэсэн юм. Мөн гишүүд нэр дэвшигч Д.Гангабаатар нь намд элсэж байгаагүй, намд ажиллаж байгаа мэргэжлийн судлаач хэмээн үзэж, дэмжиж байгаагаа илэрхийллээ. 

Мөн УИХ-ын гишүүн Т.Доржханд 1920-иод жилийн туршлагатай маш сайн хуульчийг оруулж ирж байгаад баяртай байна. Ийм байдлаар Үндсэн хуулийн цэцэд гэрэл гэгээ ажиглагдаж байна. Үе үеийн Үндсэн хуулийн цэцийн гишүүд үргэлж дарга, албан тушаалтнуудад үйлчилж байсан гэдэг хувь хүний бодол бий. Тэгэхээр хэн нэгэн эрх мэдэлтэй албан тушаалтан үүнийг шийд гэж танд даалгавал түүнийг хүлээж авахгүй байж чадах уу гэж нэр дэвшигчээс асуумаар байна. Нөлөөнд орохгүй, ёс зүйгээ сахиж чадах эсхийг лавласан юм. 

Түүний асуултад нэр дэвшигч Д.Гангабаатар: Үндсэн хуулийн цэцийн гишүүний баримтлах хэд хэдэн зүйлийг Үндсэн хуульд шууд тусгасан байдаг. Жишээ нь, Үндсэн хуульд захирагдан ажиллах, ялангуяа улстөрчдөөс хараат бус ажиллах зарчмыг тусгасан. Хэрэв томилогдвол энэ зарчмыг баримтлан ажиллана гэсэн юм.

Улмаар МУИС-ийн Хууль зүйн сургуулийн багш Д.Гангабаатарыг Үндсэн хуулийн Цэцийн гишүүнээр эцэслэн томилох асуудлыг хэлэлцэж санал хураалт явуулахад чуулганы хуралдаанд оролцсон 43 гишүүний 34 нь буюу 79.1 хувь нь дэмжлээ. УИХ-ын тогтоолд “Улсын дээд шүүхийн санал болгосноор Д.Гангабаатарыг ҮХЦ-ийн гишүүнээр томилсугай. Бүрэн эрхийн хугацаа нь дуусгавар болсон тул Д.Солонгыг ҮХЦ-ийн гишүүнээс чөлөөлсүгэй. Энэ тогтоолыг 2021 оны аравдугаар сарын 7-ны өдрөөс эхлэн дагаж мөрдөсүгэй” хэмээн бичжээ.  Энэ үеэр УИХ-ын дарга Г.Занданшатар “Дээд шүүхийн тавьсан өндөр шалгуурыг Д.Гангабаатар давж орж ирлээ. Цаашид УИХ, Ерөнхийлөгч болон  бусад байгууллаагас томилох Цэцийн томилгоог сонгон шалгаруулалтын зарчимт тулгуурлан явуулна” гэдгийг онцлосон юм.