Эрүүл мэндийн яамнаас коронавируст халдварын нөхцөл байдлын талаар мэдээлэл хийлээ. 

Энэ үеэр ХӨСҮТ-ийн захирал Ц.Билэгсайхан дельта хувилбарын давлагаа оргил үедээ хүрээд байгаа талаар мэдээлсэн юм. 

Тэрээр "Бид гуравдугаар тунгийн дархлаажуулалтад өндөр настай, архаг суурь өвчтэй хүмүүсээ идэвхтэй хамруулах чиглэл барьж байна. Мөн стратегийн ач холбогдолтой байгууллагууд буюу хил гааль, цэргийн анги гэх мэт байгууллагуудад ажиллаж байгаа хүмүүсээ идэвхтэй хамруулах чиглэл байгаа. Вакцины бүрэн тунг хийлгэснээс хойш 14 дэх хоног дээр эсрэг биеийн титр хамгийн өндөр түвшинд тодорхойлогдож байгаа ч тодорхой хугацаа өнгөрхөд сар сараар буурч байгаа учраас дархлаа сэргээх нэмэлт тунг хийж байна. 

Шинэ тохиолдлын тоо, эерэг эзлэх хувь, нас баралтын тоо гээд хэд хэдэн үзүүлэлтээс харахад тархалтын тоо цаашид буурах хандлага ажиглагдаж байгаа. Вакцины хоёр тунд хамрагдсан 2.1 сая хүний 5 хувь нь буюу 100 мянга гаруй хүн халдвар авсан бол нэмэлт тунд хамрагдсан иргэдийн 1 хувь нь халдвар авч байна. Энэ 1 хувь дотроо 0.5 хувь нь вакцин хийлгэснээс хойш 14 хоногийн дотор өвчилсөн. Энэ хүмүүс вакцины хамгаалах нөлөөнд орж амжаагүй гэсэн үг. Тэгэхээр гуравдугаар тунд хамрагдсан хүмүүсийн 99.5 хувь хамгаалагдаж байна. 

Түүнчлэн дельта хувилбар одоо оргил үедээ явж байгаа халдварын давлагааны 90-ээс дээш хувийг дельтагийн халдвар эзэлж байгаа. Альфагаар өвдсөн хүмүүс дельтагаар өвдөх боломжтой. Дахин халдвар авсан 16 мянган хүн байна" гэлээ.