Монгол улсын хөдөлмөрийн баатар, гавьяат тамирчин Н.Түвшинбаяр багын найз Монгол улсын өсөх идэр начин Э.Энхбатыг ухаангүй болтол зодосны улмаас өнөөдрийг хүртэл Э.Энхбат ухаан оролгүй эмнэлэгт эмчлүүлж байсан. Тэгвэл олон сар тасралтгүй эмчилгээ хийлгэсэн  Э.Энхбат начин ухаан орсон бөгөөд холбогдох газруудад мэдүүлэг өгсөн талаар түүний өмгөөлөгч ярьсан байна. 

УЕПГ-аас Э.Энхбат начны хэргийг хохирогчийн өмгөөлөгчийнх нь хүсэлтээр нэмэлт ажиллагаа хийлгэхээр мөрдөн байцаалтад буцаасан талаар мэдээлсэн. Тус хэргийг Хан-Уул дүүргийн цагдаагийн хэлтэст хэргийг дахин нягталж шалгаж эхэлжээ. 

Хэргийг эргэн сануулахад, өнгөрсөн дөрөвдүгээр сарын 2-нд олимпын аварга Н.Түвшинбаяр улсын өсөх идэр начин Э.Энхбатын биед халдаж, хүнд гэмтэл учруулсан юм. Улмаар Э.Энхбат тархиндаа хүнд гэмтэл авч, ГССҮТ-ийн Эрчимт эмчилгээний тасагт олон хоног ухаангүй хэвтсэн ч тусыг олоогүй учраас БНСУ-д эмчлүүлэхээр явсан билээ. Үүнтэй холбоотойгоор Э.Энхбатын биед хүнд гэмтэл учруулсан Н.Түвшинбаярыг  “Хүний биед санаатайгаар хүнд гэмтэл учруулсан” гэмт хэрэгт яллагдагчаар татан ШШГЕГ-ын харьяа Цагдан хорих 461 дүгээр ангид 30 хоног цагдан хорих шийдвэрийг гаргасан байдаг. Гэвч түүний өмгөөлөгчийн хүсэлтээр өнгөрөгч тавдугаар сарын 20-д Н.Түвшинбаярт авсан цагдан хорих, таслан сэргийэх арга хэмжээг өөрчилж, түүнд холбогдох эрүүгийн хэргийг шийдвэрлэж дуустал Монгол Улсын хилээр гарахыг хязгаарлах шийдвэрийг шүүхээс гаргасан юм.