Хууль зүй, дотоод хэргийн сайдын А/229 дугаар тушаалаар байгуулагдсан Ажлын хэсэг өнөөдөр /2021.10.21/ хуралдаж, Зөрчлийн бүртгэл, мэдээллийн цахим системийн бодлогын даалгаврыг баталлаа.

Тодруулбал, Монгол Улсын Их Хурлын Хууль зүйн байнгын хорооны 7 дугаар тогтоолын хэрэгжилтийг хангах ажлын хүрээнд зөрчил шалган шийдвэрлэх, хяналт тавих эрх бүхий албан тушаалтнуудын ажлын уялдаа холбоог сайжруулах, төрийн байгууллагуудын мэдээлэл солилцох боломжийг нэмэгдүүлэх зорилгоор зөрчлийн бүртгэл, мэдээллийн цахим системийн ажлын даалгавар боловсруулах ажлын хэсгийг Хууль зүй, дотоод хэргийн сайдын 2020 оны А/208 тоот тушаалаар байгуулсан байсныг 2021 оны А/229 тоот тушаалаар шинэчлэн байгуулсан юм.

Уг хуралдаанаар Зөрчлийн бүртгэл, мэдээллийн цахим системийн бодлогын даалгаврыг батлахтай холбогдуулан тус яамны Мэдээллийн технологийн газрын дарга Д.Ган-Эрдэнэ мэдээллийн сан боловсруулах ажлын явцын талаар танилцуулга, мэдээллийг өглөө.

Тус ажлын хэсэгт Зөрчил шалган шийдвэрлэх эрх бүхий 31 байгууллагын 40 гаруй холбогдох албан тушаалтан, төлөөллүүд орж ажиллаж байгаа бөгөөд хуралдааны төгсгөлд Зөрчлийн бүртгэл, мэдээллийн цахим системийн бодлогын даалгаврын талаар санал солилцож, хэлэлцэн баталлаа.

Зөрчлийн бүртгэл, мэдээллийн цахим системийг бий болгосноор зөрчил шалган шийдвэрлэх ажиллагааны хугацаа, бичиг баримтын давхцал, бүрдлийг багасгаж, зөрчил шалган шийдвэрлэх үйл ажиллагааны хугацааг багасгаж, цахимжуулах, зөрчлийн хэрэг бүртгэлд системээс автоматаар дугаар олгох, хялбаршуулсан журмаар шалган шийдвэрлэсэн зөрчлийг нөхөн бүртгэх, автоматаар дугаар олгох, бичиг баримтын давхцал, хяналтыг сайжруулах, нэгдсэн болон тухайлсан ухаалаг статистик мэдээ, тайлан гаргахад чухал ач холбогдолтой.