ЦЕГ-аас орон сууц түрээслүүлнэ гэх нэрийдлээр бусдыг залилан мэхэлсэн хэрэг болон онц хэрцгий аргаар бусдыг дээрэмдсэн зэрэг асуудлуудтай холбогдуулан мэдээлэл хийж байна. 

 ЦЕГ-ын Мөрдөн байцаах албаны дарга Д.Отгонжаргал: Энэ оны эхний есөн сарын байдлаар  цагдаагийн байгууллагад нийт 17360 гэмт хэрэг бүртгэгдсэнээс нийслэлд 64,1 хувь буюу 11132 нь бүртгэгдсэн байна. Иргэдийн гудамж талбайд тавьсан автомашиныг хулгайлсан гэмт хэргүүд бүртгэгдсэн. Нийт 77 хэрэг бүртгэгдсэнээс 71-ийг нь илрүүлээд байна. Зургаан хэргийн эзэн холбогдогч тогтоогдоогүй, эрэн сурвалжлагдаж байна. 12-16 насны хүүхдүүд энэ гэмт хэргийг үйлдэж байгаа нь харагдаж байна. 

Приус автомашин, нүүрс хулгайлах гэмт хэрэг олноор бүртгэгдэж байна. Тухайлбал,  Ц, Д нарын найман бүлэг этгээдэд холбогдох 25 хэргийг аравдугаар сард илрүүлсэн. Мөн иргэдийн орон байрнаас эд зүйл хулгайлах гэмт хэрэгт холбогдсон О, Ш нарын зургаан этгээдийн 64 үйлдлийг нөхөн илрүүлсэн. 

Сүүлийн өдрүүдэд нийслэлийн ногоон бүс болох зуслангийн айлуудаас эд зүйл хулгайлах гэмт хэрэг нэмэгдэх хандлагатай байгаа тул иргэд өөрсдийн гэр орон, эд хөрөнгөө харуул хамгаалалттай байлгах, зуслангийн чиглэлд ажилладаг дохиолол хамгаалалтын газруудтай хамтран ажиллахыг зөвлөж байна. Мөн Баянзүрх, Сүхбаатар, Чингэлтэй дүүргийн нутагт орон сууцны хаалгыг өрөмдөн найман гэмт хэрэг гарсан ч одоогоор эзэн холбогдогчийг олоогүй байгаа. Өөрөөр хэлбэл, айл өрхийн хаалгыг өрөмддөг гэмт этгээдүүд баригдаагүй байна.

Тухайн этгээдүүд нь:

• БЗД-ийн 26 дугаар хороо Дүнжингарав хотхоны айл өрхүүдийн,
• Хан-Уул дүүргийн 11 дүгээр хороо Могул Таун хотхонд оршин суух айл өрхийн,
• Хан-Уул дүүргийн 17 дугаар хороо Оргил Стар, Ривер гарден хотхонд оршин суух айл өрхийн хаалгыг өрөмдөж, эд зүйл хулгайлсан байна.

Энэ мэт хохирол ихтэй гэмт хэргийг үйлдсэн нь анхаарал татаж байгаа. Эдгээр бүх хотхон харуул хамгаалалттай ч энэ мэт гэмт хэрэг гарч байгаа тул харуул хамгаалалтын аж ахуйн нэгжүүд, айл өрхүүд анхаарлаа дээшлүүлэх, камерын хяналтыг сайжруулах шаардлагатай байна.

Архангай, Завхан аймаг, нийслэлийн төвийн дүүргүүдийн нутаг дэвсгэрт хараа хяналтгүй орхисон иргэдийн он хуучин тээврийн хэрэгслийг хулгайлсан 18 удаагийн үйлдэлтэй, насанд хүрээгүй хүүхдүүдийн холбогдсон нийт 14 этгээдийг илрүүлсэн. 

Бид энэ тал дээр иргэдээс мэдээлэл авах ажлыг зохион байгуулж, тодорхой сэжиг бүхий этгээдүүдийг шалгаж байгаа. Бид гэмт хэргийн талаарх баттай мэдээллийг цагдаагийн байгууллага худалдаж авч байна. 

 Тиймээс иргэд сэжигтэй овор ихтэй зүйл авч яваа, бусдын барилга байгууламжийн камерыг эвдэж байгаа зэрэг мэдээллийг цагдаагийн байгууллага дээрх журмын дагуу мэдээлэл худалдаж авна" гэлээ.