АН-ын зөвлөлдөх танхимын гишүүн С.Эрдэнэ өөрийн цахим хуудсаар дамжуулан зөвхөн хүү Э.Одбаярын төлөө бус үг хэлэх эрхээ эдэлж чадахгүй байгаа бүх хүмүүсийн төлөө тэмцэх болно хэмээн мэдэгдлээ. 

Тэрээр "Хүүгийн маань эрүүл мэнд аюултай байдалд байна. Өнөөдөр хорих 461 дүгээр ангид очиж хүүтэйгээ уулзахад, сэтгэл зүрх элэг эмтэрлээ. Би 7 хүүхэдтэй. Хүүхдүүдээ эх орондоо хэрэгтэй хүн болгож, өсгөж хүмүүжүүлэхийн тулд гадаа гарч эр, дотор орж эм болж, ганцаараа өрх толгойлж явсан. Би хэр баргийн юманд хямраад байдаггүй. Намайг яаж ч доромжилсон ардчиллын төлөө явж ирсэн. Тиймээс би нийгэм, улс төрийн нөхцөл байдлыг хараад тэвчээртэй, хүлээцтэй хандсан. Миний хүү хэтэрхий биеэ даасан өөрийн үзэл бодолдоо үнэнч тууштай хүүхэд. Би хүүдээ хэзээ ч тэг ингэ гэж зааж, сургаж байгаагүй. Ялангуяяа улс төрийн чиглэлээр зөвлөгөө өгч байгаагүй. Би хүүхдүүдээ улстөрөөс хол байгаасай гэж хүсдэг. Гэхдээ миний хүү энэ улстөрийн замыг өөрөө сонгосон. Залуу хүн өөрөө өөрийнхөө үзэл бодлыг илэрхийлээд явж байгаа. 

Би одооноос дуугуй хүлээж суухгүй ээ. Би зөвхөн хүүгийнхээ төлөө биш үгээ хэлж чадахгүй байгаа, эрхээ эдэлж чадахгүй байгаа хүмүүсийн төлөө тэмцэх болно" хэмээн мэдэгджээ.