Колорадо элсэн цөлийн Коачелла хөндийд жил бүрийн дөрөвдүгээр сард дэлхийн хамгийн алдартай хөгжмийн наадмын нэг болох "Coachella Valley Music & Arts Festival" зохион байгуулагддаг. Сүүлийн 20 жилийн турш мянга мянган хөгжим сонирхогч, чиг хандлага тогтоогчдын дунд хамгийн ихээр хүлээлт үүсгэдэг наадам болж чаджээ. Коачеллагийн тайзнаа инди рок, хип-хоп, электроник, поп зэрэг хөгжмийн төрлүүдээр дэлхийн алдартай уран бүтээлчид өөрсдийгөө батлан харуулж, үзэгчдийг доргиодог.
Ковидын улмаас хоёр жил хойшилсон амьд хөгжмийн алдартай наадам энэ оны дөрөвдүгээр сарын 15-17 болон 22-24-нд уламжлал ёсоор АНУ-ын Калифорни мужийн Индио хотод зохион байгуулагдахаар товлогджээ.

Хамгийн анх 2016 онд Ази уран бүтээлчдийг төлөөлж Өмнөд Солонгосын хип хоп трио Epik high хамтлаг оролцож байсан бөгөөд энэ жил ахин оролцох урилгыг авчээ.
2019 онд Өмнөд Солонгосын охидын Blackpink хамтлаг оролцож олны анхаарлыг татаж байсан. Тайзан дээрх үзүүлбэрүүдээрээ үзэгчдийг гайхшруулж чадсан төдийгүй шүтэн бишрэгчдийнхээ тоог ч нэлээдгүй нэмсэн.

Харин 2020 оны уран бүтээлчдийн нэрсийн жагсаалтад К-попын "Ноён оргил" гэгддэг Bigbang хамтлаг багтаж байсан. Энэ нь дуу хөгжмийн ертөнцөөс гурван жил завсарлага авсан алдарт хамтлагийг эргэн нэг тайзан дээр харах боломжийг фэнүүдэд нь олгосон. Гэвч цар тахлын улмаас хөгжмийн наадам тодорхойгүй хугацаагаар хойшилж, оролцох уран бүтээлчдийн нэрс ч солигдсон.

"Coachelle 2022"-д Канье Вест, Билли Эйлиш, Харри Стайлс, Карли Рей Жепсэн, 21 Savage, Swedish house mafia зэрэг 180 орчим уран бүтээлч оролцоно. Манай Монголоос хүннү рок урсгалаар уран бүтээлээ туурвидаг The HU хамтлаг багтжээ. Дөрөвдүгээр сарын 15 болон 22-нд тайзнаа гарах хуваарьтай байна. Дашрамд дурьдахад The Hu нь 2020 онд Коачеллад оролцох урилгыг мөн авч байсан юм.

Зохион байгуулагч Голденвойс компани улс орнуудын амжилттай яваа хөгжмийн агентлагуудтай холбоо тогтоож дэлхий нийтийн сонирхлыг татахуйц  хамтлаг, уран бүтээлчдийн жагсаалтыг агентлагуудын зүгээс гаргаж өгдөг. Coachella-ийн тайзнаа тоглох уран бүтээлчдийг сонгох үйл явц ийнхүү бүтэн жилийн турш үргэлжилдэг байна. Энэ тайзан дээр дэлхий даяар нэр алдраа дуурсгаж яваа уран бүтээлчийг авчирснаараа наадмын үнэ цэнийг өргөдөг байхад, тэр бүр танигдаагүй ч төрмөл авьяасыг дэлхийд таниулдгаараа ч уран бүтээлчдийн кареерийг өсгөж “А” зэрэглэлд орсны баталгаа болдог аж.