Сүхбаатар аймгаас гаралтай сэтгүүлчдийн “Талын түрлэг” бүлгэмийн “Талын түрлэг” номын хурим энэ сарын 19-нд боллоо. 20 дугаар зууны түүхийг бүтээлцэж, хөгжлийн хүрдийг хурдасгахад оройлон оролцсон 108 эрхмийн цадиг түүхээс бүтсэн энэхүү ном нь тус бүлгэмийн хоёр дахь хамтын бүтээл юм.

Уг бүтээлийн 108 баатраас өдгөө 28 эрхэм энх тунх аж төрж буй бөгөөд номын нээлтэд Монгол Улсын Хөдөлмөрийн баатар Дамдинсүрэнгийн Шараа, Монгол Улсын Ардын жүжигчин Шарын Чимэдцэеэ, Чүлтэмийн Батсайхан, АИХ-ын дарга асан, Сүхбаатарын одонт, Монгол Улсын Гавьяат эдийн засагч Жамбын Гомбожав, “Чингис хаан” одонт, Соёлын гавьяат зүтгэлтэн, зохиолч, яруу найрагч, сэтгүүлч Гомбожавын Мэнд-Ооёо, МСНЭ-ийн хүндэт ерөнхийлөгч, сэтгүүлч, тользүйч, Соёлын гавьяат зүтгэлтэн Цэрэндоржийн Дашдондов, Гавьяат багш Сономын Дондог, Сүхбаатар аймгийн Эмэгтэйчүүдийн холбооны дарга асан Гомбожавын Улаан нар болон зарим баатрын гэр бүл, үр хүүхэд, ач зээ нар ч хүрэлцэн ирж, дурсамж, сэтгэгдлээ хуваалцлаа.

Мөн Сүхбаатар аймгийн Засаг дарга М.Идэрбат, Улаанбаатар дахь Сүхбаатар аймгийн Нутгийн зөвлөлийн дарга У.Отгонбаяр, МСНЭ-ийн Ерөнхийлөгчийн үүрэг гүйцэтгэгч З.Боргилмаа, Ерөнхийлөгчийн Тамгын газрын Хэвлэл мэдээллийн албаны ажилтан Л.Итгэлтөгс нар оролцон баяр хүргэв.

Нэгэн зууны түүхийг бүтээлцсэн 108 эрхмийн талаар эгэл энгүүн хэрнээ сонирхолтой түүхийг хүүрнэсэн, ховор чухаг баримтуудыг олж дурдсан “Талын түрлэг” бүтээлийн тэргүүн дэвтэр ийн уншигчдын гарт хүрч эхэлж байгаа бол хоёр дахь дэвтрийг Сүхбаатар аймгийн 80 жилийн ойд зориулан бүтээж буйгаа номын зохиогчид хэлсэн юм.