Их Британи, Умард Ирландын Нэгдсэн Хаант улс (ИБУИНХУ)-ын Парламентын гишүүн Даниел Кавчинскитэй холбоотой нэгэн ноцтой мэдээлэл Английн өдөр тутмын гол хэвлэл болох “Таймс” сонинд нийтлэгджээ. /Тус сонины линкийг хавсаргав/ 

Уг нийтлэлд парламентын гишүүн Даниел Кавчински нь албан тушаалаа ашиглан гадны улс орны уул уурхайн компаниудаас 250 гаруй  мянган  фунт стерлинг  буюу тэрбум гаруй төгрөгтэй тэнцэх шагнал авсан гэх мэдээлэл гарчээ. Түүнийг гадны уул уурхайн компаниас өндөр цалин авч тэдний ашиг сонирхлыг ядуу буурай орнуудад лобби хийх замаар гүйцэлдүүлдэг байж болзошгүй гэх үндэслэлээр шалгаж байцаасан байна. Мөн “Таймс” сонинд Даниел Кавчински нь Монголын уул уурхайн салбарын төлөөлөгчидтэй  уулзалт хийсэн гэх мэдээлэл нь анхаарал татахаар байна.

Сонирхолтой нь Даниел Кавчински нь манай Монголтой холбоотой ажилладаг бөгөөд Британи, Умард Ирландын Нэгдсэн Хаант улсын Монгол Улсыг хариуцсан худалдааны элч төлөөлөгчөөр ажилладаг. Түүнчлэн саяхан дуулиантайгаар буусан Английн Ерөнхий сайд асан Борис Жонсонтой гүн нягт холбоотой ажилладаг, түүний тавьсан хүн гэгддэг. Борис Жонсоныг кабинетын бүх  сайд  нь эсэргүүцэж ажлаа хаяж огцорсноор Жонсон Ерөнхий сайдын албанаасаа Английн түүхэнд байгаагүйгээр шившигтэйгээр буухад хүрсэн. Ийм хүний тавиул гэх Английн парламентын гишүүн Даниел Кавчински гадны улс орны уул уурхайн компаниас хууль бус мөнгө авсан байж болзошгүй хэрэгт холбогдож байцаагдсан  бөгөөд тэрээр энэ талаараа уучлалт гуйсан юм. Яг энэ мөчид Монголд ирчихсэн   Улаанбаатар хотын даргатай албан уулзалт хийж байна гэх мэдээлэл нь тавигджээ.

Гадны уул уурхайн компанид зөвлөгөө өгөх нэрийдлээр 250 гаруй мянган фунт стерлинг хууль бусаар олсон гэж “Таймс” сонинд бичигдэж буй Даниел Кавчински нь Монголд ямар зорилготой явна вэ гэдэг нь бас анхаарал татаж байна.

Эх сурвалж: “Өдрийн сонин”