Хүний эрхийн Үндэсний Комиссын гишүүн Б.Энхболдоор ахлуулсан ажлын хэсэг Баянхонгор аймаг дахь Цагдаагийн газарт 2023 оны 09 дүгээр сарын 07, 08-ны өдөр ажиллах үеэр хүний эрхийг хангаж, хамгаалах чиглэлээр авч хэрэгжүүлсэн арга хэмжээ, үр дүнтэй танилцаж, мөрдөн шалгах ажиллагаанд хохирогч төвтэй арга зүйг ашиглаж буй байдал, алба хаагчдын хөдөлмөрлөх эрх, алба хаагчдын талаар иргэдээс ирүүлсэн гомдол мэдээллийн талаар санал солилцов.

Түүнчэн Цагдаагийн газрын эрүүлжүүлэх, баривчлах байрны нөхцөл байдалтай танилцаж, хүний эрхийг хангах чиглэлээр санаачилгатай ажиллаж байгааг сайшаагаад, цаашид баривчлагдсан иргэдийн эрхийг хангах, алба хаагчдын хөдөлмөрийн аятай нөхцөлийг хангах чиглэлээрх үйл ажиллагаагаа сулруулахгүй байхыг зөвлөв.

Тухайлбал, Баянхонгор аймгийн Цагдаагийн газрын санаачилгаар аймгийн Иргэдийн төлөөлөгчдийн хурлаас орон нутгийн санхүүжилтээр Эрүүлжүүлэх, баривчлах байрны өргөтгөл барих ажлыг эхлүүлж, сонгон шалгаруулалтыг зарласан байна.

Ажлын хэсэг тус аймаг дахь Цагдаагийн газарт ажиллах үеэрээ “Хүний эрхийг хамгаалах үндэсний тогтолцоо, цагдаагийн байгууллагын гүйцэтгэх үүрэг” сэдвээр сургалт явуулж, цагдаагийн алба хаагчийн эрх хууль ёсны эрх ашгийг хамгаалах, хөдөлмөрлөх эрхийн нөхцөл байдлын талаар ХЭҮК-оос хэрэгжүүлж буй бодлого, арга хэмжээний талаар танилцуулж, асуултад хариулав.  

Ташрамд дурдахад, Зөрчлийн тухай хууль, Шүүхийн шийдвэр гүйцэтгэх тухай хуульд зөрчил үйлдэж баривчлах шийтгэл оногдуулсан шүүхийн шийдвэрийг зориулалтын байр, стандартын шаардлага хангасан нөхцөлд эдлүүлнэ гэж заасан нь хүний эрхийг хангахад ач холбогдолтой зохицуулалт хэдий ч санхүүгийн нөхцөл байдлаас шалтгаалан өнөөдрийн байдлаар 6 аймагт л дээрх хуулийн хэрэгжилт хангагдаад байгаа юм.