Монгол улсад хүн амын нийт өвчлөлийн дотор архи хэрэглэх хорт зуршлын улмаас үүсэх өвчлөл 5.6 хувийг эзэлж байна. Түүнчлэн нийт нас баралтын 25 хувь нь архитай холбоотой байна.

Насанд хүрэгчдийн дунд архинд донтох эмгэгтэй хүн нийт хүн амын 13.6%-ийг эзэлдэг бөгөөд үүний 22% эрчүүд эзэлдэг байна. Мөн эрдэмтэд архинд донтох эмгэгтэй иргэдийн 70 хувь нь архинаас гарах хүсэлтэй байдгийг нотолсон.

Манай оронд архидалт газар авч тэр нь нийгмийн дэг журам зөрчих, ноцтой гэмт хэрэг үйлдэх, үйлдвэрлэлийн осол гарах, иргэдийн эрүүл мэндэд хохирол учруулах, ёс зүйн доройтолд оруулах үндсэн шалтгаан болж байна. 2014 онд хийсэн судалгааны үр дүнд архи, мансууруулах бодисын шалтгаант гэмт хэрэгт 144 хүн шалгагдаж байсан бол 2018 онд 402 болон өссөн байна.

Монгол улсын нийт хүн амын 30-46% нь сэтгэцийн тулгамдсан асуудалтай буюу манай оронд хамгийн багадаа 500 мянган хүн сэтгэцийн тулгамдсан асуудалтай гэсэн судалгаа байдаг.  Бусад улс орны залуучуудын стрессийн түвшинг судалсан судалгаагаар Америк 62%, Энэтхэг 46% , Япон 42% , Их Британи 27% байдаг бол Монгол улсын залуучууд 59% нь стресстэй байгаа нь өндөр үзүүлэлт юм. 2016 онд санамсаргүй түүврийн аргаар ажлын байрны стрессийг 190 орчим иргэдийн дунд судлахад ажлын байрны стресс харьцангуй өндөр гарсан байна.