Дорноговь аймгийн Сайншанд сумын ЕБС-ийн сурагч охин хичээлдээ явахаар гараад өнөөдрийг хүртэл сураггүй байгаа билээ. Үүнтэй холбоотойгоор цахим орчинд охиныг олдсон, олдоогүй болон амь үрэгдсэн, эсэн мэнд байгаа гэх зэрэг олон эргэлзээтэй мэдээлэл тархаад байна. Тиймээс Хөдөлмөр нийгмийн хамгааллын яам (ХНХЯ), Гэр бүл, хүүхэд, залуучуудын хөгжлийн газар (ГБХЗХГ) болон Цагдаагийн ерөнхий газраас (ЦЕГ) хамтран цаг үеийн болон хүүхдийн асуудлаар мэдээлэл хийж байна. 

Энэ үеэр ХНХ-ийн сайд Х.Булгантуяа, ХНХЯ-ны зүгээс хүүхэд хамгааллын асуудал дээр төрийн байгууллагуудтай хамтран ажилладаг. ХНХЯ, ГБХЗХГ-ын зүгээс хэрэг мөрдөн шалгах явцад прокурорын зөвшөөрөлгүйгээр мэдээлэл өгөх боломжгүй. Бидний зүгээс хүүхдийг эсэн мэнд олдоосой, эрүүл саруул байгаасай гэж хүсэж байна. Тиймээс аймгийн ОБГ-тай хамтран ажиллаж, нисдэг тэргийг эрэн хайх ажиллагаанд гаргасан. Улсын хэмжээн 1,2 сая хүүхэд бий. Тиймээс хүүхдийн асуудалд бүх хүн гар бие оролцох нь зүйтэй байна. Он гарснаас хойш 108 утсанд 70 мянга гаруй дуудлага ирсний 70 орчим хувь нь зорилтот бүлэг байна.

Цаашид хүчирхийллийн гэмт хэргийн хуулийн санкцыг чангатгах хэрэгтэй гэж үзэж байна. Мөн бэлгийн хүчирхийлэл, гэмт хэрэг үйлдсэн нь хууль, хяналтын байгууллагаар тогтоогдвол тухайн хүнийг зураг, нэртэй нь олон нийтэд зарлана. 

Мөн шилжих хөдөлгөөний дунд хүүхдүүд бүртгэлгүй үлдэх тохиолдол гардаг. Гэр бүлийн хүчирхийлэлд өртсөн хүүхдийн талаар ангийн багш нь мэдээд хорооны нийгмийн ажилтай ярилцан холбогдох арга хэмжээг авах гэж байтал тухайн хүүхдийг шилжүүлсэн тохиолдол гарсан. Тиймээс хүүхэд бүрийг цахим хувийн хэрэгтэй болгох хэрэгтэй байна. Ингэснээр тухайн хүүхдийн эцэг, эх асран хамгаалагч хүчирхийлэл үйлдвэл цахим хувийн хэрэгт бүртгэл үүсч улмаар холбогдох арга хэмжээг авахад илүү хялбар болох юм.

Мөн хүүхэд хамгааллын чиглэлээр иргэд, олон нийтэд мэдээлэл сурталчилгааны ажлыг зайлшгүй хийх шаардлагатай байгаа учраас та бүхнийг хамтран ажиллахыг хүсч байна гэлээ.