Гэмтэл согог судлалын үндэсний төвөөс улирал тутам уламжлал болгон зохион байгуулдаг AMPUTEE STRONG буюу “Дэмжих бүлгийн уулзалт” амжилттай зохион байгуулагдлаа.

Осол гэмтэл болон бусад идээт шархны үрэвсэл, бэртлийн дараа мөч тайрагдах мэс засалд орсон эмчлүүлэгчдэд зориулан эрүүл мэндийн үзлэг, сэтгэл зүйн зөвлөгөө, мэдээллийг хүргэх зорилготой тус уулзалтад доод мөчдийн тайралт хийгдсэн 20 гаруй үйлчлүүлэгч оролцсон юм.

“Дэмжих бүлгийн уулзалт”-аар “Ахиллис Монгол” олон улсын байгууллагын салбарын үүсгэн байгуулагч, багш, судлаач, марафон гүйлтийн тамирчин О.Саранчулуун, протезийн мэргэжилтэн М.Эрдэнэцогт болон ГССҮТ-ийн Сэргээн засах эмчилгээний тасгийн сэтгэл зүйч А.Пүрэвцэрэн, салбар эмнэлгийн сэтгэл зүйч Л.Мягмарсүрэн нар шаардлагатай зөвлөгөө мэдээллийг өгснөөс гадна хиймэл хөлний төрөл загвар, чанар хийц болон бусад хэрэглэгдэхүүний талаар танилцуулсан байна.

Энэ удаагийн уулзалт нь авто болон үйлдвэрлэлийн осолд өртөх, ахуйн хүрээнд санамсар болгоомжгүй байдлаасаа болж бэртэж гэмтэх, хүнд өвчний улмаас доод мөч тайрагдах мэс засалд орсон эмчлүүлэгчдийн эрүүл мэнд, сэтгэл зүйн нөхцөл байдлыг дэмжиж, амьдралын чанарыг дээшлүүлэх, гэр бүл болон нийгмийн харилцааны тулгамдсан асуудлыг ярилцаж, шийдвэрлэх арга замуудын талаар хамтдаа зөвлөлдсөн чухал уулзалт боллоо.