Засгийн газрын ээлжит хуралдаанаас гаргасан шийдвэрийг Шадар сайд С.Амарсайхан, ОБЕГ-ын дарга Г.Ариунбуян нар танилцууллаа. 

Өнөөдрийн хуралдаанаар албан үүргээ гүйцэтгэж яваад амь эрсэдсэн Онцгой байдлын алба хаагчдын ар гэрт олгох мөнгөн тусламжийн асуудлыг шийдвэрлэжээ. Мөн осолд өртөж эмнэлэгт эмчлүүлж байгаа иргэдийн эмчилгээнд зориулсан тодорхой санхүүжилт олгох асуудлыг шийдвэрлэсэн байна. 

Гал түймэрт өртсөн 60 айлын орон сууцыг засахтай холбоотой зардал болон оршин суугчдын түр хугацаанд байрлаж байгаа түрээсийн байрны зардлыг Засгийн Газрын нөөц хөрөнгөөс гаргахаар болжээ. 

Шадар сайд С.Амарсайхан: "Зориулалтын газ тээвэрлэх автомашин мөн байсан бол яагаад бүртгэлгүй байсан бэ? Зүгээр машин очоод мөргөхөөр л суваг нь нээгдчихдэг юм уу? хаана алдаа гарсан байна зэрэг нарийн асуудлыг мэргэжлийн байгууллагууд нь тогтооно. 

Гал унтраах аврах анги орох нөхцөл яагаад бүрдээгүй байсан, зориулалтын дагуу байшин барилга баригдсан эсэх, зам хаалттай байсан зэрэг асуудлууд хөндөгдөж байгаа" гэв. 

ОБЕГ-ын дарга Г.Ариунбуян: "Галд өртсөн "Edu Apartment"-ын 63 айлын 198 оршин суугчдын хэвийн амьдралын горим руу шилжүүлэх буюу засвар тохижилтын асуудлыг НЗДТГ шийдвэрлэнэ. Харин тухайн иргэдийг түр байрлуулах түрээсийн зардлыг 1.4 тэрбум төгрөг гэж тооцсон. Энэ зардлыг Засгийн газрын нөөц хөрөнгөнөөс гаргана. НЗДТГ-аас байр түрээслэгч компаниудтай хамтарч иргэдтэй зөвшилцөөд хаана байр түрээслэх асуудлыг шийднэ. Харин ослын эцсийн дүгнэлт гараагүй байна. Ямартай ч осол гарах шалтгааныг бүрдүүлсэн буруутай этгээдээр хохирлыг барагдуулах болно" гэлээ.