Zarig.mn сайтын үүсгэн байгуулагч, сэтгүүлч Н.Өнөрцэцэгт холбогдох гэм буруугийн шүүх хуралдаан 2 дахь өдрөө үргэлжилж байна. Шүүх хуралдааны завсарлагын үеэр мэдээлэл өглөө.

Тэрбээр, "Шүүх хурал хаалттай явж байгаа учраас процессын талаар яривал дахиад хэрэгт орох учраас ярьж болохгүй байна. Юу чухал байна гэхээр өмгөөлөгчөөр хангаж өгөөч гэсэн хүсэлтийг маань хүлээн авсангүй хоёр дахь өдрөө өмгөөлөгчгүй шүүгдэж байна. Бас нэг зүйл нь намайг төрийн нууцыг хадгалсан гэж буруутгаж байгаа юм. Гэтэл төрийн нууцыг задруулсан дарга, сайд нь яагаад буруудахгүй байгаа юм бэ. Нэг талд нь нууц хадгалсан бол тэр нууцыг задруулсан хүн байх ёстой биз дээ.

Хоёрдугаарт татварын асуудлаар буруутгаж байна. Ган үзэгтэн ХХК 22 хүнийг цалинжуулаад холбогдох татвараа төлөөд явж байна. Өмнө нь татварын асуудал байсан бол яагаад анхааруулж, зөвлөж, акт тавилгүйгээр шууд буруудаж байгаа юм бэ гэдэгт гайхаж байна. Татварын асуудалтай газарт эхлээд акт тавьдаг биз дээ. Тэрийг тавиагүй шүү дээ. Үнийн дүн нь инээдэмтэй. Одоо хэлж болохгүй байна. Хаалттай болж байгаа учир нарийн мэдээлэл хэлж болохгүй.

Гуравдугаарт хуурамч мэдээлэл тараасан гэж буруутгаж байна. Өнөөдөр сөрөг хүчин байхгүй байна. Сэтгүүлчид тэр дундаа зариг.мн сайт сөрөг хүчний үүрэг гүйцэтгэж ирсэн. Үүнийхээ төлөө миний биш хэвлэлийн салбарын амыг барих гэсэн оролдлого гэж харж байна. Шүүхэд нөлөөлөх оролдлого гэж хэлж байна. Шүүх гадаа нь хүн зогсохоор шийдвэрээ өөрчилдөг болчихсон юм уу" гэсэн юм.

Мөн шүүх хурлыг нээлттэй явуулах хүсэлтийг удаа дараа тавьсан ч хүлээн аваагүйг хэлсэн бөгөөд бүх дансыг нь шалгаж, асууж байгааг олон нийтэд ил тод явуулахыг хүсэж байгаагаа хэллээ.