УОК-оос ОХУ-тай хиллэдэг зарим боомтуудыг тодорхой хугацаатайгаар хаах саналыг Засгийн газрын хуралдаанд оруулахаар болжээ.

Тодруулбал Алтанбулагийн боомтыг 2021 оны 1-р сарын 15-ыг хүртэл хаах санал гаргажээ. Энэ талаар Засгийн газрын Хэвлэл мэдээллийн албаны дарга Ц.Ганзориг танилцууллаа. 

Тэрбээр “ОХУ-тай хил залгаа Цагааннуур, Боршоо, Алтанбулаг боомтуудад холбогдох албаны гурван ажлын хэсэг ажилласан. Сая Улсын онцгой комиссын хуралдаанаар гурван ажлын хэсгийн санал, дүгнэлтийг сонслоо. Ингээд эрсдлийг үндэслэж, ОХУ-тай хиллэж байгаа Сэлэнгэ аймгийн Алтанбулаг боомтыг арваннэгдүгээр сарын 16-наас эхлэн 2021 оны нэгдүгээр сарын 15-ныг хүртэл хоёр сарын хугацаанд хаах саналаа Засгийн газрын хурлаар маргааш оруулж, хэлэлцүүлэхээр шийдвэр гаргалаа. Ийм шийдвэр гаргах болсон шалтгаан нь өнөөдрийн байдлаар Алтанбулаг боомтоор орж ирсэн ачаа тээврийн нийт 40 жолоочоос коронавирусийн халдвар илэрсэнтэй холбоотой юм. Нийт халдвар авсан 40 жолоочийн гурав нь өөрийн хүсэлтээр ОХУ-руу буцсан бөгөөд одоо нийт 37 жолоочийг Улаанбаатар хотод авчирч ХӨСҮТ-д эмчилж байгаа. Гэсэн ч тээвэрлэлтийн явцад халдвар хамгааллын дэглэм алдагдах эрсдэлээс болгоомжлон Алтанбулаг боомтыг хоёр сарын хугацаатай хаах санал гаргаж байгаа юм. Эцсийн шийдвэрийг Монгол Улсын Засгийн газар маргааш хэлэлцэж гаргана" хэмээн хэллээ.

Мөн Цагаануур, Эрээнцав зэрэг бусад боомтыг арваннэгдүгээр сарын 16-наас эхлэн түр хугацаагаар хаах саналыг гаргаж байна" гэлээ. Харин Баян-Өлгий аймгийн Цагааннуур боомтыг энэ сарын 23-наас эхлэн гарагийн зохицуулалттайгаар нээхээр төлөвлөжээ.