Баасан гарагт Израйлийн музейд зочлох үеэр 4 настай хүүхэд хүрэл зэвсгийн үеийн ваарыг санамсаргүйгээр унагаан хагалсан тухай музейгээс мэдээлэв. Хайфагийн их сургуулийн “Hecht” музейд байрлуулсан эртний ваар нь манай эриний өмнөх 2200-1500 оны үед хамаарах бөгөөд хамгийн багадаа 3500 жилийн настай. Саяхныг хүртэл энэ ваар нь бүрэн бүтэн байсан учир маш ховор олдвор байсан юм.

Хүүгийн аав хэлэхдээ “Дотор нь юу байгааг сониучирхан ваарыг татсанаас болж ваар хагарсан” гэж мэдээлэл өгжээ. Алекс эвдэрсэн олдворын хажууд хүүгээ хараад шоконд орсон бөгөөд эхлээд манай хүүхэд хагалаагүй гэж эхлээд бодсон боловч хүүхдээ тайвшруулсны дараа хамгаалалтын ажилтантай ярьжээ.

"Үзүүлэнгийн эд зүйлсийг зориудаар гэмтээх тохиолдол байдаг бөгөөд ийм тохиолдолд цагдаа дуудан эрүүгийн хариуцлага хүлээлгэдэг" гэж музейн захирал Инбал Ривлин хэлэв. Харин энэ тохиолдолд нөхцөл байдал тийм биш бага насны хүүхэд музей үзэж байгаад санамсаргүй байдлаар савыг гэмтээсэн тул зохих хариуцлагыг өөрөөр хүлээлгэнэ” гэв.

Уг ваарыг музейн үүдэнд шилэн хаалтгүйгээр байрлуулсан байсан бөгөөд энэ нь "археологийн эд зүйлсийг олон нийтэд хүртээмжтэй болгох" үүднээс тэгсэн гэж Ривлин тайлбарлав.

"Археологийн олдворыг ямар нэг хаалтгүйгээр харах нь үнэхээрийн сэтгэл татам байдаг гэж тус музей үздэг бөгөөд энэхүү үйл явдлыг үл харгалзан “Hecht” музей энэ уламжлалыг үргэлжлүүлэх болно" гэж тэр хэлжээ.

Савыг сэргээхээр байгаль хамгаалах мэргэжилтэн сонгогдсон бөгөөд Ривлин үүнийг "богино хугацаанд байранд нь буцааж өгнө" гэжээ. Гэр бүлийнхэн нь зассан олдвортой танилцахаар уригдсан гэж Ривлин хэлсэн бөгөөд ирэх амралтын өдрүүдэд дахин зочлохоор төлөвлөж байна.

Эх сурвалж: ABC news

Бэлтгэсэн: О. Янжинлхам