Дэлхийн ур чадварын 47 дахь уралдаан 2024 оны есдүгээр сарын 10-ны өдрөөс есдүгээр сарын 16-ны өдрүүдэд Бүгд найрамдах Франц Улсын Лион хотод зохион байгуулагдах бөгөөд Монгол Улсын баг CNC токарь, гагнуур, өрөг угсралт, цахилгаан, мужаан, тогооч, сантехник гэсэн 7 мэргэжлийн төрлөөр оролцохоор бэлтгэл ажлаа хангаж байна.

Дэлхийн ур чадварын уралдаанд оролцох бэлтгэл ажлын хүрээнд чадамжийн төвийг түшиглэсэн бэлтгэл сургалтын байгууллага дээр, аж ахуйн нэгж байгууллага, ажлын байранд, гадаад дотоодын хамтарсан бэлтгэл мөн бусад орнуудын ур чадварын сорилго уралдаанд оролцлоо. Мэргэжлийн ур чадварын бэлтгэлээс гадна сэтгэл зүйн ганцаарчилсан болон багийн, уралдааны дүрэм, журам, нэгдсэн сургалтыг уралдаанд оролцогч, эксперт багш, багийн гишүүдийг хамруулан олон талын оролцоог ханган зохион байгууллаа.

Энэхүү уралдаанд оролцох багт төрийн далбаа гардуулах хүндэтгэлийн үйл ажиллагааны үеэр Боловсролын сайд П.Наранбаяр оролцогчдод мэндчилгээ дэвшүүлэн, амжилт хүсэж, багийн гишүүдэд төрийн далбааг гардуулан өглөө.

Бэлтгэл хангах, зохион байгуулалтад хамтран ажилласан нийт сургалтын байгууллага, мэргэжлийн холбоод, аж ахуйн нэгж байгууллагууддаа талархсанаа илэрхийлье.

Дэлхийн ур чадварын уралдаанд оролцох нийт баг, оролцогчдодоо амжилтын буухиагаа үргэлжлүүлж, мөрөөдлийнхөө эзэд болохыг хүсье.