УИХ-ын гишүүн, ИЗНН-ын дарга Батын Батбаатар Төсвийн байнгын хорооны дарга Ц.Даваасүрэнг Ёс зүй, дэгийн байнгын хороонд шалгуулахаар өнгөрсөн даваа гаригт ханджээ.  Учир нь Төсвийн байнгын хорооны дарга Ц.Даваасүрэн   өөрийнх нь бүрэн эрхэд халдсан гэж үзэж Ёс зүйн байнгын хороонд албан бичиг хүргүүлсэн нь энэ аж.

 Тус албан бичигт “ Монгол Улсын Их Хурлын тухай хуулийн 8 дугаар зүйлд УИХ-ын гишүүний бүрэн эрхийг зааж, 8 дугаар зүйлийн 8.1.9-д “хуульд өөрөөр заагаагүй бол хууль тогтоомжийн төслийн талаар зарчмын зөрүүтэй саналын томьёоллоо холбогдох Байнгын хороонд ажлын хоёроос доошгүй өдрийн өмнө хүргүүлэх:, УИХ-ын чуулганы хуралдааны дэгийн тухай хуулийн 39 дүгээр зүйлд Байнгын хорооны хуралдаанаар  хуулийн төслийн анхны хэлэлцүүлэг явуулах тухай зааж, 39 дүгээр зүйлийн 39.14-т “Гишүүн, нам, эвслийн бүлэг энэ хуулийн 39.17-д заасан зарчмын зөрүүтэй саналаа хууль, тогтоолын төслийг яаралтай горимоор хэлэлцэж байгаагаас бусад тохиолдолд холбогдох Байнгын хороо хуулийн төслийн анхны хэлэлцүүлэг явуулахаас ажлын хоёроос доошгүй өдрийн өмнө бичгээр урьдчилан ирүүлсэн байна” гэж заасан болно. Иймд УИХ-ын гишүүн Б.Батбаатар миний дээрхи хууль тогтоомжид заасан бүрэн эрхэд халдсан асуудлаар дараах мэдээллийг гаргаж байна:

     Төсвийн байнгын хорооны дарга, Төсвийн ажлын хэсгийн дарга Ц.Даваасүрэн нь УИХ-ын гишүүн Б.Батбаатарын гаргасан 2025 оны Төсвийн төсөл хэлэлцэхтэй холбоотой 53  заалт бүхий зарчмын зөрүүтэй саналуудыг хуульд заасан хугацаанд бичгээр хүргүүлсэн боловч хүлээн авч Төсвийн байнгын хорооны хуралдаанаар хэлэлцүүлээгүй, санал хураалгаагүй болно.

    Дээр дурдсан хуулиуд болон “Монгол Улсын Их Хурлын гишүүний ёс зүйн дүрэм”-ийн 2 дугаар зүйлийн 2.1.3-т Үндсэн хууль, хууль ёсыг дээдлэн сахиж биелүүлэх: 3 дугаар зүйлийн 3.6-д “Гишүүн цөөнхийн саналыг хүндэтгэн асуудлыг олон ургалч үзлийн үүднээс чөлөөтэй хэлэлцэж, олонхийн саналаар шийдвэрлэх зарчмыг баримтална” гэж заасныг зөрчсөн байна. Иймд дээр дурдсан асуудлаар “Монгол Улсын Их Хурлын гишүүний ёс зүйн дүрэм”-ийн 10 дугаар зүйлийн 10.2 дахь хэсэгт заасны дагуу хянан шийдвэрлэж, холбогдох арга хэмжээг авна уу” гэжээ.  

   Ямартай ч Ёс зүй, дэгийн байнгын хороо Ц.Даваасүрэн гишүүнийг ёс зүй алдсан эсэхийг нь хэлэлцэх шаардлага гарсан байна.

                                                                              О.Янжинлхам