Монголын худалдаа аж үйлдвэрийн танхимын ээлжит бус XXII их хурал өнөөдөр  болно. Энэ хурлын  хамгийн их анхаарал татаж байгаа нь Танхимын ерөнхийлөгчийн нөхөн сонгууль.

    Тус  нөхөн  сонгуульд Т.Дүүрэн, “Таван богд”-ын Ц.Баатарсайхан, “Урбанек”-ийн Г.Лхагважав  нар өрсөлдөх нь одоогоор ил болсон мэдээлэл. Харин Танхимын Ерөнхийлөгчийн сонгуулийн өмнөх өдөр  Т.Дүүрэнд таслан сэргийлэх арга хэмжээ авч байна гээд гуч хоног хорихоор болов. Хэнийг энэ сонгуульд ялуулах гэж хаанаас шидсэн чулуу хамгийн боломжит дэмжлэг авах магадлалтай Т.Дүүрэнг онилов.

      Т.Дүүрэн өөрийн сошиал хуудаснаа “ Намайг үндэслэлгүй хэргээр гэнэт дуудаж 30 хоног таслан хорихоор боллоо. Миний бие өөрийн биеэр бус ч Танхимын нөхөн сонгуульд оролцох эрмэлзэлтэй байгааг үүгээр мэдэгдэж байна” гэжээ. Мөн тэрээр өчигдөр MNB сувгаар ярилцлага өгөх байсан ч гаргахыг нь хориглосон тухай өөрийн нүүр хуудсандаа бичсэн бөгөөд “...Үг хэлэх, өөрийгөө өмгөөлөх бүх эрхийг хязгаарлалаа. Энэ улсад хувийн хэвшлийн орон зай байхгүй болжээ. Өнөөдөр намайг, маргааш та нарыг дуудаж  таслан хорих  аж” хэмээсэн байна.

    МХАҮТ нь Монголын бизнес эрхлэгчдийн нэгдэл болсон хамгийн том төрийн бус байгууллага.  Улс төрөөс харьцангуй тусдаа, хамаарал багатай явж ирсэн  байгууллага.  Ямартай ч олон нийт, хэвлэл мэдээллийнхний анзаарч байгаагаар Т.Дүүрэнг хорих ажиллагаа Танхимын нөхөн  сонгуультай хамаатай болох нь гарцаагүй гэж үзэж байна.  Мөн ажиглагчдын  таамгаар бол улс төрийн оролцоотой аж. Т.Дүүрэнтэй өрсөлдөх гол өрсөлдөгч нь Ц.Баатарсайхан бөгөөд улс төрийн дэмжлэг ихтэй, энэ сонгуульд ялах гэж хамгийн их хичээж байгаа хүн гэх юм билээ.  Ямартай ч нөхөн сонгуулийн үр дүн өнөөдөр гарна. Хэдийгээр нөхөн сонгуулийн өмнөх өдөр хоригдсон ч Т.Дүүрэн  өрсөлдөхөөсөө татгалзахгүйгээ өөрийн цахим хуудсаар мэдэгдсэн. Өөрөөр хэлбэл  хоригдож байгаа ч нэрээ татахгүй гэсэн байна.