АНУ-ын Засгийн газраас АНУ-ын Олон улсын хөгжлийн агентлагаар (ОУХА) дамжуулан хэрэгжүүлсэн “Бизнесийн Тогтвортой Хөгжлийг Сайжруулах, Ил Тод Байдлыг Нэмэгдүүлэх” (Business Excellence for Sustainability and Transparency буюу BEST) хөтөлбөрийн таван жилийн хугацаанд Монгол Улсын 5,397 жижиг, дунд бизнесийн санхүүжилтийг нэмэгдүүлэх зорилгоор 100.4 сая ам.долларын (329.7 тэрбум төгрөг) зээл авч 4,000 гаруй ажлын байрыг шинээр бий болгоход дэмжлэг үзүүлсэн байна.

2019 онд тус агентлагийн эхлүүлсэн 15 сая ам.долларын санхүүжилт бүхий BEST хөтөлбөрийн хүрээнд санхүүгийн удирдлага, маркетингийн чиглэлээр, үүний дотор зээлийн өргөдөл, бичиг баримт хэрхэн бүрдүүлэх зэрэг олон төрлийн сургалтууд бизнес эрхлэгчдэд зориулан явуулсан билээ.

АНУ-ын ОУХА-ийн хөтөлбөрийн голлох амжилтуудын нэг нь эмэгтэй хүн удирддаг болон хөдөө орон нутагт үйл ажиллагаа явуулдаг бизнесийг бэхжүүлэх явдал байв. ОУХА-ийн дэмжлэгээр олгосон нийт зээлийн талаас илүү хувийг эмэгтэй хүн удирдсан бизнест олгон нийт 3,005 эмэгтэй бизнес эрхлэгчдийг чадавхижуулсан байна. Мөн тус хөтөлбөрийн хүрээнд хөдөө орон нутгийн 176 гарааны болон жижиг бизнес эрхлэгчдэд 500,000 ам.доллар буюу 1.7 тэрбум төгрөгийн буцалтгүй тусламж олгож, уг санхүүжилт нь аж ахуйн нэгжүүдэд шинэ тоног төхөөрөмж худалдан авах, шинэ ажлын байр бий болгох, орон нутагт эдийн засгийн идэвхжлийг нэмэгдүүлэхэд тусалжээ. Бизнес эрхлэгчдийн хамтын ажиллагааг идэвхжүүлж, орон нутгийн засаг захиргаатай хамтран бүс нутгийн хөгжлийн стратегийг боловсруулан батлуулж, цаашдаа жижиг дунд бизнест тогтвортой үр өгөөж хүртэхэд нь дэмжлэг үзүүлэх төрийн бус байгууллагуудыг үүсэн бий болоход нь Улаанбаатар хот болон 12 аймгийг хамарсан BEST төсөл түлхэц болжээ.

АНУ-аас Монгол Улсад суугаа Элчин сайд Ричард Буанган хэлсэн үгэндээ: АНУ-ын ОУХА-ийн BEST хөтөлбөр нь ирэх жилүүдэд Монголд жижиг бизнесүүд хөгжих хүчирхэг суурийг тавьсан гээд “Бид Монголын хувийн хэвшилтэй цаашдаа ч хамтран ажиллаж, боломжуудыг бий болгож, урт хугацааны эдийн засгийн хөгжил цэцэглэлтэнд нь хувь нэмрээ оруулах болно гэдэгтээ итгэлтэй, бас баяртай байна” хэмээсэн байна.

АНУ-ын Олон улсын хөгжлийн агентлаг нь энэхүү BEST хөтөлбөрийн амжилтандаа тулгуурлан Монгол Улсын эдийн засгийн өсөлтийн дэмжин, төрөлжүүлэх зорилгоор жижиг дунд бизнесийн эрчим хүчний хэмнэлт, байгаль орчны тогтвортой байдал, өрсөлдөх чадварыг нэмэгдүүлэх чиглэлд таван жилийн хугацаатай нийт 10 сая ам.долларын (34 тэрбум төгрөг) санхүүжилт бүхий шинэ хөтөлбөрийг 2025 онд эхлүүлэх болно хэмээн Монгол Улс дахь Америкийн Нэгдсэн Улсын Элчин сайдын яам мэдээлэв.