УИХ-ын чуулганы нэгдсэн хуралдаан цахимаар эхэлж, 2021 оны төсвийг хэлэлцэж байна. Чуулганы танхимд УИХ-ын зарим гишүүд болон ажлын хэсэг гэсэн 20 гаруй хүн байна. Тухайлбал УИХ дахь МАН-ын бүлгийн дарга Д.Тогтохсүрэн, АН-ын бүлгийн дарга Д.Ганбат, УИХ-ын дэд дарга Т.Аюурсайхан, Төсвийн байнгын хорооны дарга Б.Жавхлан, Сангийн сайд Ч.Хүрэлбаатар нар чуулганы танхимаас оролцож байна. Бусад нь өөр өөрийн байгаа газраасаа чуулганы хуралдаанд оролцож байна. Чуулганы хуралдаанд нийт 70 гишүүн оролцож байгаа юм. 

монгол улсын  парламент 2 дахь удаагаа цахим хэлбэрээр хуралдаж байгаа нь энэ. Өмнөх парламент өнгөрсөн хавар цахимаар хуралдаж байсан удаатай бөгөөдл тэрхүү туршлага дээр үндэслэн цахимаар хуралдаж байгаа юм. 

Монголчуудын дунд сонин дээрээ соохолзоно. Сониноо буурахаар хоохолзоно гэсэн үг байдаг даа. Цар тахлын хатуу хөл хорио 5 өдөр үргэлжлэх ч цаашид сунгагдах өндөр магадлалтай. Учир нь манай улсын дотооддын халдварын тоо нэмэгдсээр байгаа. Нөхцөл байдал улам хүндэрч хөл хориог дахин сунгавал УИХ-ын гишүүд өнөөдрийнх шиг идэвхтэй чуулганы хуралдаа оролцох болов уу... 

Харин 2021 оны төсвийн эцсийн хэлэлцүүлэгтэй холбогдуулж гишүүд асуулт асууж хариулт авч байна.

УИХ–ын гишүүн М.Оюунчимэг:  Ирэх оны төсөлд коронагийн эрсдлийг хэрхэн тооцоолсон бэ. Мөн санхүүжилтийг хэрхэн  тусгав. Эрүүл мэндийн асуудал чухал болж байгаа учраас төсөвт тодотгол хийх шаардлага үүсэх үү.

Төсвийн байнгын хорооны дарга Б.Жавхлан: Засгийн газраас оруулж ирсэн ирэх оны төсвийг онцгой цаг үед батлах гэж байна. Ирэх оны төсөвт цар тахлыг хамгийн хүндээр төсөөлөөгүй ч гэсэн хэрэв эрсдэл учирвал гэсэн нөхцөлтэйгөөр боловсруулсан гэж бодож байгаа. Хэрэв цар тахал хүндэрвэл иргэдийнхээ орлогыг хүүхдийн мөнгөөр дамжуулж тэтгэх зорилгоор  870 тэрбум төгрөгийг хүүхдийн мөнгөнд суулгасан. Үүнийг УИХ-аас ч гэсэн хэвээр нь баталж байна. Онцгой нөхцөлд ажиллаж байгаа төрийн бүхий л байгууллагын санхүүжилт, худалдан төсвийг нь анх оруулж ирсэн байдлаар нь батлах гэж байна. Тодорхой хэмжээгээр эрсдэлийг тооцоолсон төсөв болсон.

УИХ–ын гишүүн Ц.Даваасүрэн: 2020 оны төсвийн тодотголоор 4.8 их наяд төгрөгийн алдагдалтай төсөв баталсан. Энэ алдагдал зээлээр санхүүжигдэнэ. Үүнээс болж өрийн үзүүлэлт  ялангуяа ДНБ-тэй харьцуулсан харьцаа 60 хувь руу дөхсөн байна лээ. Ирэх оны төсвийн алдагдал 2.2 их наяд гэхээр 62 хувьд хүрнэ. Төсвийн алдагдал ДНБ-ний 70 хувьд хүрвэл эдийн засаг хүндэрнэ. Дотоодын бонд гэхээс илүүтэй хямд эх үүсвэрээр санхүүжлэх боломж байна уу?.

Сангийн сайд Ч.Хүрэлбаатар: Засгийн газар хямд эх үүсвэртэй зээлээр төсвийн алдагдлыг санхүүжүүлэх бодлого барьж байгаа. Нийтдээ 3.4 их наяд төгрөгийн хөрөнгө оруулалтад байгаа гадаадын зээл тусламжаар санхүүжигдэх 1.4 их наяд төгрөгийн эх үүсвэр хямд өртөгтэй эх үүсвэрээр санхүүжигдэнэ. Бонд гаргасан тохиолдолд бид урьд өмнө авсан бондуудыг буцааж худалдах замаар өрийн зохицуулалтыг хийхээр төлөвлөж байгаа.

УИХ–ын гишүүн Х.Булгантуяа: Цар тахлын тухай  хууль энэ оны арванхоёрдугаар сарын 31-нд дуусна, Засгийн газар ямар бодолтой байна вэ. Цар тахлын үед төсвийн тодотголыг хийхэд ч амаргүй. 7.2 хувийн эдийн засгийн өсөлтийг хэр  биелэгдэнэ гэж харж байна вэ?.

Сангийн сайд Ч.Хүрэлбаатар: Цар тахлын тухай хуулийн хэрэгжих хугацаа энэ онд дуусгавар болно. Засгийн газар энэ хуулийн хугацааг дахин зургаан сараар сунгах саналыг УИХ-д оруулж байгаа. Цар тахлын хууль дотор нэг удаа зургаан сараар сунгана гэсэн зохицуулалт бий.