Эрүүл мэндийн сайд Т.Мөнхсайханы санаачилгаар эрүүл мэндийн салбарт хэрэгжиж буй бодлогын түвшний ажлуудын үр дүн, бодит асуудлын хүрээнд эмч нарын саналыг сонсох, шийдвэрлэх арга хэмжээг шууд авах зорилготой “Эмчээ сонсъё” өглөөний уулзалтыг зургаан өдрийн турш зохион байгууллаа.

Тус уулзалтыг танхимын болон цахимаар зохион байгуулж, нийт 800 орчим эмч мэргэжилтнүүдтэй уулзсан бөгөөд эрүүл мэндийн даатгалын санхүүжилт, цалингийн асуудал, эмч нар ажлын байрандаа иргэд үйлчлүүлэгчдийн дарамтанд өртөх, зөвшөөрөлгүй зураг авч, бичлэг хийх зэргээр хувь хүн төдийгүй ажил мэргэжлийн нэр хүндэд нь халдах байдал нэмэгдэж байгааг салбарынхан нь учирласан байна.

Эрүүл мэндийн сайд энэ хүрээнд “Эмч нарын цалин сүүлийн дөрвөн жилд тодорхой хувиар нэмэгдэж байгаа, хойшид ч нэмэгдэнэ. ЭМДС-ийн өрийг барагдуулж, үүсээд байгаа санхүүгийн асуудлыг бүрэн шийдвэрлэхээр ажиллаж байна. Түүнчлэн “Эрүүл мэндийн салбарын эрх зүйн орчныг сайжруулах”, “Эрүүл мэндийн даатгалын сангийн тухай” хуулиудыг УИХ-ын намрын чуулганд хэлэлцүүлэхээр хүлээгдэж байна.

Эмч нарын нэр төрд халдах, цаашлаад биед халдах байдал ч газар авч байгааг хуулиар зохицуулдаг болно. Цаашид эмч, эмнэлгийн мэргэжилтний эрх зүйн байдал, нийгмийн асуудал, эрүүл мэнд боловсролд илүү анхаарсан бодлого хэрэгжүүлж ажиллана” хэмээн онцоллоо.