Дэлхий дахинаа нэг минут тутам нэг сая хуванцар сав, таван тэрбум пластик уут үйлдвэрлэгдэж байгаагийн зэрэгцээ тэдгээрийн тэн хагас нь нэг удаагийн зориулалттай бүтээгдэхүүн байдаг. Бидний өдөр тутамд хэрэглэдэг хуванцар сав, түүнд агуулагдах химийн бодисууд нь хүний эрүүл мэндэд олон төрлийн сөрөг нөлөөллийг үзүүлдэг тухай бид сонсож байсан ч хуванцар сав, тэр дундаа савласан ус, хүнс, ус хадгалах сав нь бүтээгдэхүүнийг хадгалах, тээвэрлэх, хэрэглэхэд хялбар, тохиромжтой байдаг шалтгаанаар бид өнөөг хүртэл хэрэглэсээр байна.

2018 онд Америкийн судлаачид дэлхий дахинд борлуулагддаг, 11 төрлийн савласан уснаас дээж авч, шинжлэхэд дунджаар нэг литр усанд 240,000 орчим хуванцар хэлтэрхий агуулагдаж байгаа ба үүний 90% нь нанопластик, үлдсэн хувь нь микропластик байсан нь судалгаагаар тогтоогджээ. Судалгааны үр дүнгээр хуванцар савтай усанд усыг шүүж, цэвэршүүлэхэд ашиглагдах поливинил хлорид, полистирол мөн полиамид, полиэтилен терефталат (PET), Поликарбонат хуванцар (BPA) зэрэг нь хамгийн их агуулагдаж байгааг илрүүлсэн байна.

Микропластик нь нэг нанометрээс таван миллиметрийн диаметртэй жижиг хэсгүүд бол нанопластик нь түүнээс жижиг, хүний үсний дундаж өргөнөөс 1000 дахин нарийн ширхэгтэй тул хоол боловсруулах зам, амьсгалын замаар дамжин хүний биеийн цусны урсгалд нэвтэрч, эд, эсийг архаг байдлаар хордуулах нөлөөг үзүүлдэг.

Хүний биеийн дотоод шүүрлийн хэвийн үйл ажиллагааг алдагдуулан, биеийн хөгжил, нөхөн үржихүй, мэдрэл болон дархлаа тогтолцоонд сөргөөр нөлөөлдөг ба судалгаагаар дотоод шүүрлийн тогтолцоог доголдуулагчид нь хорт хавдар, таргалалт, чихрийн шижин, бодисын солилцооны эмгэг, үргүйдэлд хүргэхээс гадна, төрөхийн өмнөх болон нярайн хөгжлийн эхэн үе буюу эрхтэн, мэдрэлийн тогтолцоо бүрэлдэн хэлбэрээ олох үеийн эрсдэлийг нэмэгдүүлж байгааг тогтоосон байдаг.

Иймд та бүхэнд өөрийн болон гэр бүлийнхээ эрүүл мэндийг хайрлан хамгаалж, эрүүл амьдралын хэвшлийг цогцлооход тустай дараах зөвлөгөөг хүргэж байна. Үүнд:

• Худалдан авалт хийхдээ даавуун уут ашиглаж хэвших;
• Нэг удаагийн усны савнаас татгалзаж, олон дахин ашиглах боломжтой, BPA агуулаагүй усны сав хэрэглэж хэвших;
• Худалдан авалт хийхдээ пластик савлагаатай бүтээгдэхүүн худалдаж авахаас зайлсхийх;
• Өдрийн хоолыг шилэн саванд эсвэл зориулалтын ган саванд /SS 304, 316/ авч явах;
• Ундны ус хадгалах савыг стандартад нийцсэн саваар солих;
• Аливаа бүтээгдэхүүнийг шилэн саванд хадгалж хэвших.

Эх сурвалж: Нийгмийн эрүүл мэндийн үндэсний төв