Монголын Мянганы сорилтын сан нь” Мянганы сорилтын II Компакт гэрээ буюу Усны Компакт”-ийн хүрээнд улаанбаатар хотын усны тогтвортой хэрэглээг урт хугацаанд хангах зорилготойгоор Улаанбаатар хотын нийт ус хангамжийг нэмэгдүүлэх хөтөлбөрийг хэрэгжүүлж байгаа билээ. Уг хөтөлбөрийн үр өгөөж болон усны ухаалаг хэрэглээг олон нийт, залуучуудад түгээн таниулах зорилготой “Усан тойрог” гадна талбайн нээлттэй үзэсгэлэн-танин мэдэхүйн арга хэмжээг “Бидний ус-Бидний ирээдүй” уриан дор Улаанбаатар цэцэрлэгт хүрээлэн /Рио Парк/-д зохион байгуулж байгаа юм.

7 хоног үргэлжлэх энэхүү арга хэмжээнд аравдугаар сарын 08 ны өдөр УСУГ-ын инженер техникийн ажилтан албан хаагчдаас бүрдсэн 100 гаруй хүний бүрэлдэхүүнтэй баг оролцож, УСУГ-аас явуулж байгаа бодлого үйл ажиллагаа, хэрэглэгчдэд чигэлсэн мэдээ мэдээллийг өгч ажиллаа. Тухайлбал УСУГ-ын Усны төв лабораторийн Химич Х.Соёл-Эрдэнэ “Усны чанар, шинжилгээ, лаборатори” сэдэвт сонирхолтой лекцийг оюутан залууст танилцуулсан бол, УСУГ-ын хэрэглэгчдэд үйлчлэх албанаас хэрэглэгч гэрээлэгч байгууллагуудтай хэрхэн хамтран ажиллах, цаашлаад УСУГ-аас явуулж байгаа үйл ажиллагааны талаархи нээлттэй мэдээллийг өгч ажилсан байна.

Ташрамд, Монголын Мянганы сорилтын II Компакт гэрээний тухай АНУ-ын Мянганы сорилтын корпорацын 350 сая ам.долларын буцалтгүй тусламж, Монгол Улсын Засгийн газрын 112 сая ам.долларын хөрөнгө оруулалтаас бүрдсэн нийт 462 сая ам.долларын санхүүжилт бүхий Усны Компакт гэрээгээр нийслэл Улаанбаатар хотын өсөн нэмэгдэж буй эрэлт хэрэгцээг хангах ус хангамжийн шинэ эх үүсвэрүүд, Монгол Улсад анх удаа Ус гүн цэвэршүүлэх болон Ус дахин боловсруулах хоёр томоохон үйлдвэр байгуулахаас гадна ус хангамж, ариутгах татуургын үйлчилгээний байгууллагуудын институцийн чадавхыг бэхжүүлэх, хууль, эрх зүйн орчныг сайжруулах замаар усны салбарын тогтвортой байдлыг хангахад чиглэсэн цогц хөтөлбөр хэрэгжүүлнэ. Ингэснээр Улаанбаатар хотын ус хангамж 80 гаруй хувиар нэмэгдэж, нийслэл хот баруун зүгт өргөжин тэлэх, эдийн засаг өсөх таатай боломж бүрдэх юм.