-Өрх бүрд 1 сая төгрөг олгогдохгүй болох уу?-

 2021 оны Төсвийн тухай хуульд Монгол Улсын Ерөнхийлөгч Х. Баттулга хориг тавьсан. Тэгвэл МАН-ын бүлэг өнөөдөр хуралдаж хоригийг хүлээж авахгүй байх нь зөв гэж хуралдаанд оролцсон гишүүдийн олонх үзжээ. Бүлгийн хуралдаан үргэлжилж байгаа бөгөөд хоёр сайдын мэдээллийг сонсч байгаа юм.

Дэлхий дахинд тархаад байгаа коронавируст халдвар /COVID-19/-ын цар тахал дотоодод алдагдаж байхад 2021 оны улсын төсөв нь үрэлгэн байдлыг бүрэн халж чадаагүй, улсын болон дэлхийн эдийн засагт үүсээд байгаа нөхцөл байдлыг олон талаас нь бодитойгоор дүгнэж, төсвийн бодлогод тусгаагүй байна гэж Монгол Улсын Ерөнхийлөгч үзсэн.

Ингээд төсвийн нийт зардлыг 20 хувиар хэмнэж, хүндрэл бэрхшээлийг даван туулахад зориулсан Эрсдэлийн сан байгуулах, өрх бүрд нэг сая төгрөгийн дэмжлэг үзүүлэх хөтөлбөрийг боловсруулах, 200,000 төгрөгийг бэлнээр олгож, үлдсэн 800,000 төгрөгийг зөвхөн үндэсний үйлдвэрлэгчээс архи, согтууруулах ундаа, тамхины төрлөөс бусад бараа, бүтээгдэхүүн худалдан авах эрхийн бичиг /ваучер/-ээр олгох, төсвийн хэмнэлтээр бий болсон хөрөнгийн тодорхой хувийг коронавируст халдварын эсрэг вакцин худалдан авахад зарцуулж, иргэдийнхээ эрүүл мэндийг хамгаалах гэх мэт саналыг төсөвт зайлшгүй тусгах шаардлагатай байна гэж Ерөнхийлөгч үзсэн.

Ерөнхийлөгчийн хоригийг МАН-ын бүлгээс хүлээж авахгүй гэж үзсэнээр Өрх бүрд 1 сая төгрөг олгогдох асуудал бүрхэг болж байгаа юм.

 Б.АНХМАА