УИХ-ын чуулганы хуралдаанаар Монгол Улсын Засгийн газар, Японы олон улсын хамтын ажиллагааны байгууллага хоорондын “Ковид-19 цар тахлын эсрэг хариу арга хэмжээний яаралтай тусламжийн зээл”-ийн Зээлийн хэлэлцээрийг соёрхон батлах тухай хуулийн төслийг хэлэлцэж байна. 

Уг зээлээр цар тахлын үед эдийн засгийг идэвхжүүлэх, нийгмийн эрүүл мэндийг хамгаалах, иргэдийн амьжиргааг дэмжих, орлогыг хамгаалах, нийгмийн хамгааллын арга хэмжээнүүдийг хэрэгжүүлэхэд дэмжлэг үзүүлж төсвийн зарлагыг санхүүжүүлэхээр төлөвлөжээ. 

УИХ-ын гишүүн Ж.Ганбаатар: 12 сарын 11 хүртэл 18 төрлийн байгууллагын үйл ажиллагааг хэвийн явуулж байгаа. Тэр хугацааг хүлээлгүй бусад байгууллага, ААН-ийг ажиллах боломжоор хангаж өгөөч гэдэг хүсэлт гаргаж байна. Энэ бол миний хүсэл биш иргэд, ААН-үүдээс ирж байгаа санал юм. Үсчин, хоолны газруудыг үе шаттай, тодорхой хязгаарлалттайгаар ажиллуулах боломжоор хангаж өгөөч. Анх халдвар тарсан үетэй харьцуулахад ерөнхийдөө хяналтдаа авсан гэсэн. Тиймээс ААН-үүдээ бас хамт авч явах шаардлагатай байна.  

Сангийн сайд Ч.Хүрэлбаатар: Ж.Ганбаатар гишүүний хэлж байгаатай санал нэг байна. Одоогоор нийтдээ 18 салбар үйл ажиллагаа явуулж байна. Дараа нь 19 дэх нь, 20, 21 дэх нь аль салбар байх вэ, халдвар тархаахгүй байх нөхцөл байдлыг хэрхэн хангах вэ гэдэг бэлтгэл ажил хийгдэж байх ёстой. Бүгдийг нь тас хориод асуудал шийдэгдэхгүй гэдэгтэй бид бүгд санал нэг байна.  

УИХ-ын гишүүн Б.Жавхлан: Энэ зээл ОУВС-тай хэрэгжүүлсэн хөтөлбөрийн үргэлжлэл мөн үү. Хөтөлбөрийг хэрэгжүүлж байх үед Монгол Улс гадаад өрүүдээ төлөх гэхээр гадаад зээлийн эх үүсвэрээр зээлээ төллөө гэж цааргалдаг байсан. Одоо хөтөлбөр дууссан учраас ирэх онуудад гадаад өрүүдээсээ төлж эхлэн боломжтой юу. Энэ гэрээн дээр хориглосон зүйл байхгүй бизд ээ. 

Сангийн сайд Ч.Хүрэлбаатар: Энэ бол ОУВС-тай хамтран хэрэгжүүлж байсан тэр хөтөлбөртэй хамаагүй зээл. Нийтдээ 800 орчим сая ам.долларын зээл авахаар ОУВС-тай тохирсон байсан. Үүнээсээ өмнө Японтой тохирсон байсан. ОУВС-гаас 280-аад сая ам.долларыг л авсан. Үлдсэнийг нь аваагүй байгаа. 

Энэ зээлийг зөвхөн ковидтой холбоотой асуудалд зарцуулна. 2020 оны 4-10 дугаар сарын хооронд авч хэрэгжүүлсэн ААН-үүдийг нийгмийн даатгалын шимтгэлээс чөлөөлөх, 1.5 тэрбум төгрөг хүртлэх борлуулалтын орлоготой ААН-үүдийг орлогын албан татвараас чөлөөлөх, хувийн хэвшилд ажиллаж буй иргэдээс хувь хүний орлогын албан татварыг авахгүй чөлөөлөх, хүүхдийн мөнгө олгох зэрэгтэй холбоотой арга хэмжээнүүдийг санхүүжүүлэхэд хэрэглэнэ. 

УИХ-ын гишүүн Т.Доржханд: Сангийн яам зээлтэй холбогдуулан эх үүсвэрээ татах чиглэлээр идэвхтэй ажилламаар байна. Өр өснөө гэдгээр харахаасаа илүүтэй. Олон улсын платформуудыг хэрхэн үр өгөөжтэй ашиглах вэ гэдэгт анхаарал хандуулах хэрэгтэй. 

Сангийн сайд Ч.Хүрэлбаатар: Японы олон улсын хамтын ажиллагааны байгууллагын төсөл хамгийн үр өгөөжтэй. Мөн бид цаашид иймэрхүү зээлийн төслийг авч ашиглахад бэлэн. Энэ төрлийн зээлийн төслийн үр ашиг үзүүлж байгаа хувь нэмрийг ойлгож байна.

УИХ-ын гишүүн Х.Болорчулуун: Монгол Улс 31 тэрбум ам.долларын өртэй байна. Өрийн тааз хэдэн хувьд хүрсэн бэ. Эрдэнэтээс тав дахин их орлоготой Оюутолгойн борлуулалтын мөнгө Монголоор дамжиж орж ирэхгүй байна. Дубайн гэрээг өөрчлөхөөр Засгийн газраас ажлын хэсэг гарсан ч нэг жил болж байна. Одоог хүртэл таг чиг. 

Сангийн сайд Ч.Хүрэлбаатар: 2016 онд Монгол Улсын Засгийн газрын ДНБ-ий гадаад өрийн эзлэх хувь 78.8 хувь байсан бол одоо 56.2 хувь болж 6 функтээр буусан. Одоогийн байдлаар 8 их наяд ам.долларын зээлийг төлчихөөд байна.