Төрийн байгуулалтын байнгын хорооны өнөөдөр /2026.06.16/-ийн хуралдаанаар Улсын Их Хурлын 2026 оны хаврын ээлжит чуулганаар хэлэлцэх асуудлын жагсаалтад ороогүй Орон сууцжуулалтын тухай, Орон сууцны санхүүжилтийн төрөлжсөн банкны тухай анхдагч хуулийн төсөл , Гэр бүлийн хөгжлийг дэмжих тухай хуулийн төслүүдийг хэлэлцэхийг байнгын хорооны гишүүд дэмжсэн бол Төсвийн тогтвортой байдлын тухай хуулийн төсөл болон Төрийн албаны тухай хуульд нэмэлт өөрчлөлт оруулах тухай хуулийн төслүүдийг хэлэлцэхийг дэмжсэнгүй.

Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн нэгтгэсэн төслийн анхны хэлэлцүүлгийг хийх үеэр УИХ дахь АН-ын бүлэг нэг хоногийн завсарлага авснаар Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд, Монгол Улсын Их Хурлын хяналт шалгалтын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийн анхны хэлэлцүүлэг хойшлов.

Хуралдааны төгсгөлд Төрийн албан хаагчийн ёс зүйн тухай хууль тогтоомжийн биелэлт, төрийн албан хаагчийн ёс зүйн зөрчлийн нэгдсэн дүн, төлөв байдлын талаарх Ёс зүйн хорооны тайланг хэлэлцлээ. Ёс зүйн хороо, дэд хороод ёс зүйн зөрчлөөс урьдчилан сэргийлэх соён гэгээрүүлэх сургалт, сурталчилгаа, хэлэлцүүлэг, нөлөөллийн арга хэмжээг тогтмол зохион байгуулсны үр дүнд төрийн албан хаагчдын ёс зүйн зөрчил буурах, албан хаагчдын харилцаа, хандлагад эерэг өөрчлөлтүүд гарч, өнгөрсөн онд төрийн албан хаагчийн ёс зүйн зөрчил 51.4 хувиар буурчээ. Цаашид тоонд бус чанарт анхаарч, иргэдийн төрийн албанд итгэх итгэл нэмэгдсэн эсэх, төрийн албаны нэр хүнд өссөн эсэх, төрийн албан хаагчдын хандлага, ажлын бүтээмж, гүйцэтгэлд ахиц гарсан эсэхийг тайландаа онцлохыг байнгын хорооны гишүүд захилаа.