МҮОНРТ-ийн Үндэсний зөвлөлийн гишүүдээр Ж.Цэсэн, Г.Отгонбаяр, Ч.Батцэнгэл, М.Наранбаатар, Б.Ганболд, МУСГЗ, МҮОНТ-ийн нэвтрүүлэгч Д.Цоодол нарыг нэр дэвшүүлснийг УИХ-ын Төрийн байгуулалтын байнгын хорооны гишүүдийн олонх нь дэмжсэн юм.

Үүнтэй холбоотойгоор МҮОНРТ-ийн  ажилчид болон үйлдвэрчний эвлэлийн гишүүд  телевизийнхээ гадна гэр барьж, эсэргүүцлээ илэрхийлсэн. Уран бүтээлчид Б.Ганболд, Ч.Батцэнгэлийг УИХ-ын чуулганаар батлуулвал тэмцлийн хурц хэлбэрт шилжихээ мэдэгдсэн юм. Энэ үеэр МҮОНРТ-ийн сэтгүүлч Б.Пүрэв болон дууны найруулагч, инженер нарын гурван хүнийг цагдаагийн байгууллагаас бүх нийтийн өндөржүүлсэн бэлэн байдлын үед жагсаал, цуглаан, нийтийг хамарсан арга хэмжээ зохион байгуулахыг хориглох заалтыг зөрчсөн гэх үндэслэлээр саатуулсан байна.

Сэтгүүлч Б.Пүрэв: МҮОНРТ-ын хамт олны 500 гаруй хүний  эсэргүүцэж байгаа Батцэнгэл гэж 20 жил энэ байгууллагын бүх дарга, захирлын суудалд сууж хамт олон, уран бүтээлчдийг биш амин хувиа бодож ирсэн хүнийг ҮЗ-д оруулах гэж яагаад нэр төрөөрөө дэнчин тавьж дэмжүүлэх хуйвалдаан зохион байгуулав аа? Танд хамт олны үзэн ядалтыг дэвэргэж, бослого үймээнд турхирах  ямар шаардлага, ашиг сонирхол байна вэ?  МҮОНРТ бол тэртусмаа удирдах дээд байгууллага ҮЗ бол салбар бүрийн мэргэшсэн мэргэжилтнүүдийн ухаанаа уралдуулж, уран бүтээлээрээ Монголын 3 сая үзэгчдийг соён гэгээрүүлэх хуулиар хүлээсэн үүрэгтэй ОЛОН НИЙТИЙН телевиз гэдгийг УИХ-ын энэ гишүүдэд ойлгуулах цаг болсон" гэлээ.