Өнөөдөр ЭМЯ-аас хийдэг өдөр тутмын мэдээллийн үеэр ГХЯ-ны Консулын газрын захирал Л.Мөнхтүшиг гадаад гацсан иргэдийг эх орондоо авч ирэх асуудлаар мэдээлэл өглөө.

Тэрээр "Энэ сард гурван удаагийн нислэг үйлдэхээр төлөвлөж байсан ч иргэдийн санал мөн нөхцөл байдлаа харгалзан үзээд Франкфурт руу нэмэлт нэг нислэг төлөвлөж нийт дөрвөн удаагийн нислэг хийхээр боллоо. Энэ сарын нислэгээр урьдчилсан байдлаар нийт 720 гаруй иргэн эх орондоо ирнэ гэсэн тооцоо байна. Гадаадын 17 улсад 100 орчим иргэн санхүүгийн хүндрэлтэй байдалд орсноо ЭСЯ-дуудаа мэдэгдэж байсан. Тиймээс бид НҮБ-ын Олон улсын шилжилт хөдөлгөөний байгууллагатай хамтран гадаадын 11 улсад байгаа 48 иргэнд нислэгийн тизийг нь худалдан авч өгөн, тусгаарлалтын зардлын төлбөрийг иргэдэд туслах сангаас гаргах зохицуулалт хийхээр төлөвлөж байна. 

Тусгай нислэгээр иргэдээ авч ирэх ажил цаашид ч үргэлжилнэ. Мөн Монгол Улсаас гадаад улс руу явах иргэдийн хүсэлтийг хангаж ажиллаж байгаа бөгөөд энэ сарын 19, 20-нд Токио руу нислэг үйлдэхээр болсон. Түүнчлэн ӨМӨЗО-нд ОХУ-аас очсон ачаа тээврийн жолоочоор дамжин халдвар гарсантай холбоотойгоор боомтуудад халдвар хамгааллын дэглэмийг сайжруулж байна. Үүнтэй холбоотойгоор холимог гэр бүлүүдийг хил гаргах асуудал удааширч байгаа ч бид энэ асуудлаар БНХАУ-ын Элчин сайдын яамтай хамтран ажиллаж байна. ӨМӨЗО болон манай улсад дотоодын халдвар гарсантай холбоотойгоор ачаа тээврийн эргэлт огцом буурсан. Тиймээс энэ асуудал дээр ГХЯ онцгой анхаарч, ачаа тээврийн эргэлтийг нэмэгдүүлэхээр ажиллаж байна. Гашуунсухайт, Шивээхүрэн боомтод консулын ажилтан томилогдон ажиллаж яриа хэлэлцээг тогтмол хийж байгаа" гэлээ.