2020 оны Арваннэгдүгээр сарын 18-ны өдөр Нийслэлийн Чингэлтэй дүүргийн Прокурорын газраас Жүжигчин Б.Навчаад холбогдуулан яллах дүгнэлт үйлджээ. Иргэн Б.Навчаа өөрийн цахим хуудсаараа дамжуулан Хууль зүй, дотоод хэргийн сайд Х.Нямбаатарыг шүүмжилсэн билээ. Тодруулбал тэрээр цахим хуудаснаа “Ийм пост бичээд ял авахаар болж байна даа. Гомдомтгой Нямбаатар сайдыгаа та нар минь дандаа хайрласан хүндэтгэсэн пост оруулахгүй бол Гомдоод өширхөөд шүд зуугаад шүүхэд өгөөд байна шүү анхаар манайхаан. Үзэл бодлоо илэрхийлэх эрхгүй болсон шүү. Уг нь хуулийг хөнгөдсөн байна гэж бичсэн болохоос Нямбаатарын нэр хүндэд халдсан зүйл огт байхгүй юмсан. Цагдаа прокурор нь сайдынхаа талд бат зогсож таньдаа хайртай шүү л гэж байна. Шүүх нь сайддаа хайртай үгүйг харъя даа” гэжээ.

Х.Нямбаатар: Намайг гүтгэх ажлыг гардан зохион байгуулж байгаа хүмүүсийн нэг нь Б.Навчаа

Тэгвэл энэ асуудалд ХЗДХ-ийн сайд Х.Нямбаатар мэдээлэл өглөө. Тэрбээр "Сүүлийн өдрүүдэд надтай холбоотой олон гүтгэлэг явж байна. Үүний нэг нь 14-16 насны хүүхэдтэй бэлгийн харьцаанд орох гэмт хэргийг хуулиар зөвшөөрсөн этгээд гэж намайг нэрлэж байна. Гэтэл 16 насанд хүрээгүй хүнтэй бэлгийн харьцаанд тохиролцож орох асуудал нь 1926 оноос хойш үе үеийн Эрүүгийн хуульд хуульчлагдаж ирсэн заалт юм. Би өмнөх хуулиудын ажлын хэсэгт багтаж байгаагүй. Үүнтэй холбоотой миний нэр төр, алдар хүндийг гутаах ажлыг зохион байгуулалттай хийж байгаа. Тухайлбал, өнгөрсөн сонгуулиар СХД-ийн 27 дугаар тойрогт надтай өрсөлдсөн нэр дэвшигчид энэ гүтгэлгийг зохион байгуулалттай хийсэн. Энэ ажлыг гардаж хийсэн хүний нэг нь жүжигчин Б.Навчаа. гэж мэдээллээ.