Засгийн газраас эрчим хүчний үнийг тэглэснээр ачаалал хэт нэмэгдэх болсон тухай зарим албаны хүмүүс мэдээлж байна. Манай улсад өдөр бүр 17.00-21.00 цагийн хооронд эрчим хүчний хэрэглээ огцом өсдөг. Иймд энэ хэрэглээг хангахын тулд ОХУ-аас эрчим хүч худалдан авдаг юм. Нэг квт цагийн эрчим хүчийг дунджаар 243 төгрөгөөр авдаг байна.    

Гэвч өнгөрсөн ням гарагаас хойш оргил цагийн ачаалал дахин 18-20 хувиар өсжээ. Энэ байдал цаашид үргэлжилсээр байвал цахилгаан хязгаарлахаас өөр аргагүй гэж Эрчим хүчний зохицуулах хорооноос мэдэгдсэн юм. Иймд та оргил цагийн үеэр нэн шаардлагатай биш бол утас цэнэглэхгүй, цахилгаан халаагуур асаахгүй, угаалгын машин, тоос сорогч гэх мэт цахилгаан хэрэгсэл ашиглахгүй байхыг нийт иргэдэд зөвлөж байна.

Улмаар гэр хорооллын ачааллаа хэтрүүлснээс оруулгын утас, монтажны утас, гэр доторх автоматууд гэмтэх, халалт үүсэх, цаашдаа галын аюулгүй байдал алдагдаж, өөрт болоод өрөөлд маш их хэмжээний хохирол учруулах эрсдэлтэй болоод байна. Хэрэглээний эрчим хүчний үнэ тэглэснээр үүссэн гэмтлийн талаарх зураг болон бичлэг сошиалд тархаад байна.