УИХ-ын чуулганаар Монгол Улсын Ерөнхийлөгчийн сонгуулийн тухай хуулийг өчигдөр хэлэлцэн баталсан. Өмнөх Үндсэн хуульд хоёр удаа буюу 8 жил гэж байсныг шинэ нэмэлт өөрчлөлтөөр хамгийн ихдээ 6 жил гэсэн заалт орсон учир аль ч тохиолдолд 8 жилээс дээш Ерөнхийлөгч байж болохгүй болж байгаа юм. Тиймээс Үндсэн хуулийн заалтаар одоогийн Ерөнхийлөгч Х.Баттулга нэр дэвших боломжгүй болов. Энэ тухай өчигдрийн чуулганы хурал дээр яригдав.

Энэ тухай УИХ-ын гишүүн Т.Доржханд: Шинэ Үндсэн хуулиар Ерөнхийлөгч зөвхөн нэг удаа зургаан жилээр сонгогдоно гэж заасан. Одоогийн Ерөнхийлөгч, өмнө нь Ерөнхийлөгч байсан хүмүүс дахин нэр дэвших боломжгүй гэж ойлгоод байгаа гэж хэлж байв.

УИХ-ын гишүүн, Сангийн сайд Ч.Хүрэлбаатар сошиал хуудаснаа “Одоогийн Ерөнхийлөгч дахин нэр дэвших боломжгүй болсон” гэсэн байр суурийг шууд ил илэрхийлээд эхлэв.

Яг үнэндээ Ерөнхийлөгч Х.Баттулга дахин нэр дэвшихээр зэхэж, нэр дэвших сонирхолтой байсан боловч Үндсэн хуулийн нэмэлт өөрчлөлтөөр доор нь ажиллаж байсан дэргэдэх хүн нь зориуд оруулсныг эс анзаарснаас болж “гэнэдэж” ихэд бухимдангуй байсан бол одоо нэр дэвшилт дээрээ ийнхүү гацав.

Өчигдрийн чуулганы хуралдаан дээр гишүүд энэ тухай бөөрөнхийлсөн хариулт нэгэндээ чулуудаж байсан ба Х.Баттулгыг нэр дэвших эсэх дээр шууд хариулт хэлэхгүй ч нэр дэвших боломжгүйг илэрхийлсэн юм.

Юутай ч Үндсэн хуулийг давж ерөнхийлөгч Х.Баттулга дахин нэр дэвших үү үгүй юу гэдэг нь тун удахгүй тодорхой болох нь. 

Б.АНХМАА