Ажил олдохгүй байна, тэтгэлэг тэтгэмж хэрэгтэй, төр засаг харж үзэхгүй байна хэмээн гомдоллох хүн нэг биш. Үнэхээр ч төрийн алба ажил нь төрөл садангийнх болчихсон, дээр нь нас шүд, нуруу туруу, царай зүс харж байж ажилд авдаг болчихсон энэ үед танил талгүй бол төрд бүү хэл хувийн хэвшилд ажилд орно гэдэг зарим хүнд хэцүү. Гэхдээ монголчууд ажил хүнийг голохоос биш ажлыг хүн голно гэж байхгүй гэцгээдэг.

Өөрөөр бас “Санаачилгатай хүн арга хайдаг, санаачилгагүй хүн шалтаг хайдаг” ч гэдэг. Тэгэхээр хэн нэгнийг царай алдан гуйж явахын оронд өөрөө сэтгээд, санаачлаад ажил, бизнес эрхэлье гэвэл шинэ сонин санаа мундахгүй байдаг юмсанж. openbusiness.ru сайт шинээр, гэхдээ хамгийн бага зардлаар эхлүүлж болох шинэ санаануудыг ингэж зөвлөж байна.

1. АЛБАН ГАЗРУУДАД ХООЛ ХҮРГЭХ

Та гэртээ амттай сайхан хоол хийгээд албан газруудад хүргээд үз дээ. Аажмаар та өөрийн гэсэн үйлчлүүлэгч, захиалагчидтай болно. Тэр бүрий гарч гүйгээд гуанз, зоогийн газруудад ороод тухалж, тансаглаад байхыг боддоггүй хүмүүс зөндөө бий. Гагцхүү шударгаар ажиллаж тэднийхээ итгэлийг л олох хэрэгтэй...

2. ЯВГАН АЯЛАЛ ЗОХИОН БАЙГУУЛАХ

Та төрсөн хот, аймгийнхаа түүх соёлыг сайн мэддэг бол хот доторх явган аялал зохион байгуулж болно шүү дээ. Жуулчдын улирал, намар цагаар хөдөө орон нутаг, өөр хотоос шинэ оюутнууд ирдэг цаг гээд таны бизнесийн орчин юу эс мундах билээ.

3. СТАНДАРТ БУС ЭРВЭЭХЭЙ ЗАНГИА ХИЙХ

Гэрээр хийж болох атлаа тэгтэл их зардал шаардахгүй ажил. Стандарт бус эрвээхэй зангиаг мод, үслэг эдлэл, мод, дун хясаагаар ч хийж болно. Залуучууд этгээд зүйлст их сонирхолтой болоод байгааг та анзаарч байгаа л биз дээ. Таны уран сэтгэмж, ур дүй л чухал.

4. БИЗИБОРД ҮЙЛДВЭРЛЭЖ ЗАРАХ

Бизиборд гэдэг нь хүүхдийг зугаацуулахын зэрэгцээ сургах самбар тоглоом. Энд төрөл эвлүүлэх, эргэлдүүлэх, нэг нэгтэй нь холбох ч юм уу, төрөл бүрийн хөдөлгөөнт биет байрлуулан бэхэлсэн байдаг. Гарын доорх хөнгөн үзэмжтэй биетүүд ашиглаж хийсэн ийм тоглоом цэцэрлэгүүдэд ихээхэн эрэлттэй болсон шүү.

5. ЦЭЦЭГ, ЖИМСТЭЙ САГС ХҮРГЭХ

Энд мөн л нэг их зардал орохгүй ч сагсан дахь цэцэг, жимсний орцыг тохируулах билгийн нүд, энэ үйлчилгээгээ сурталчлах л чухал. Таны хэрэглэгчид эхнэрээ баярлуулах гэсэн 25-45 насны эрчүүд байх нь гарцаагүй. Хамгийн гол нь та захиалгыг нарийн авахаас гадна өөрийн гэсэн хэд хэдэн орц, жортой байх ёстой. Тэгээд шуурхай байх нь бизнесээ өргөтгөхөд чинь тус болно доо.

6. ШАР АЙРАГНЫ ЗАХИАЛГА

Энэ бол эрчүүдэд зориулсан үйлчилгээ гэдэг нь ойлгомжтой. Сагсанд тань цэцэг биш, харин шар айраг, даруулгын зууш л байна. Хиам, загас, бяслаг, эсвэл чипс, өргөст хэмх. Энэ бүхнийгээ орц жор, донжийг нь олж бэлтгээд, борлуулж болох обьектоо олбол болохгүй нь юу байна.

7. МАШИНАА ХУРИМ, ӨӨР АРГА ХЭМЖЭЭНД ТҮРЭЭСЛҮҮЛЭХ

Та цагаан өнгийн шинэвтэр гоёмсог машинтай бол үүнийгээ хурим, өөр бусад ёслолын арга хэмжээнд түрээслүүлэх сайхан боломж танд байна л гэсэн үг. Зохион байгуулагчидтай үнээ тохиролц, ийм ажилд бэлэн байгаагаа олон нийтийн сүлжээгээр зарлаад үз л дээ.

8. ШИНЖЛЭХ УХААНЫ ШОУ

Сурагч хүүхдийн дунд зохиодог баяр ёслолын үеэр хийж болох хөөрхөн бизнес бол тэднийг хөгжөөхийн зэрэгцээ сургах шинжлэх ухааны шоу. Энд хими физикийн хамгийн энгийн элдэв туршилт хийж үзүүлнэ. Гагцхүү ямар ямар туршилт хийж үзүүлэхээс шатгаалаад бэлтгэл хэрэгтэй.

9. ПОПКОРН ҮЙЛДВЭРЛЭХ

Өнөөгийн хүүхэд багачуудын сонирхдог хүнс болох попкорн уг нь хамгийн бага зардал түүхий эдээр бүтдэг хүнс. Бод л доо ердөө хоёрхон цайны халбага “түүхий эд” л нэг литрийн хэмжээтэй попкорн болдог юм шүү дээ. Гэхдээ тоног төхөөрөмж авахаас эхлүүлээд, эрх баригчдаас үйлдвэрлэл эрхлэх зөвшөөрөл авах гээд бэрхшээл бий л дээ.

10. АВТО АСРАГЧ ХИЙХ

Хувьдаа машинтай хүмүүс бол хөл хөдөлгөөн ихтэй том хотуудад ажил мундахгүй. Ялангуяа авто замны түгжрэл ихтэйгээс болоод хүмүүс хүүхдээ сургуульд хүргэж өгчхөөд ажилдаа явахад хоцрох гээд байдаг бол ийм хүмүүсийн хүүхдийг цэцэрлэг, сургуульд, өдөр өнжүүлэх, дугуйланд хүргэж өгөх, буцааж гэрт нь авчрах ажил хийж болно. Таксинд явахаас давуутай нь байнгын түнштэй харилцан итгэлцэл дээр тулгуурладаг сайн талтай.

11. ЖОЛООЧ НАРТ АНХААРУУЛГА ЗАРАХ

Машины кабинд үнэр түгээгчийг жолооч бүр авдгийг санаж л байгаа биз дээ. Үүн лүгээ арын шилэн дээрээ сонин содон зураг дүрс наах сонирхолтой хүн бас байж л байгаа...ур хийцтэй юу ч байж болно. Ерөнхийлөгчөөс эхлүүлээд замын цагдаа, төрөл бүрийн амьтан, бүр инээдтэй дүрс ч байж болох. Гарын уртай бол өөрөө хийгээд зарж болох.

12. ЦАГИЙН НӨХӨР

Буруугаар ойлгох хэрэггүй, ганц бие, эсвэл өндөр настнуудад зориулсан гэрийн жижиг засвар үйлчилгээ л гэсэн үг. Ганхаж найгасан сандал, шүүгээний салж унах гээд байгаа хаалга, эрэг боолт нь суларсан эд зүйлд айлд юу эс билээ. Гарын дүйтэй, бас багажтай бол ийм хэрэглэгч хайгаад, нэг их үнэрхээд байхгүй бол хэрэглэгч, захиалагч мундахгүй.

13. ХИВС ЦЭВЭРЛЭХ ЯВУУЛЫН ҮЙЛЧИЛГЭЭ

Энэ бас л хэн ч хийж болох тун боломжийн ажил. Та боломжийн цэвэрлэгч, багажтай л бол интернэт, олон нийтийн сүлжээгээр зар тавиад явуулын үйлчилгээ эрхлэхэд яагаад болохгүй гэж. Өөрийн гэсэн үйлчлүүлэгчтэй болж болно, ялангуяа баяр ёслолын өмнө бол манайх шиг гэр хороолол ихтэй газарт үйлчлүүлэгч мундахгүй.

14. ЧИХЭР ЖИГНЭМГЭН БАЙШИН

Хүүхэд гэдэг амттанаас гадна сонин хачин зүйлд дуртай байдаг. Яг адилхан амттай жигнэмэг байхад энгийнээс нь илүү сонин содон төрхтэй, зохиомжтойг нь илүү сонирхоно. Та гэрийн нөхцөлд жигнэмэг хайраад түүгээрээ байшин барилга, цамхаг цайз хийж дүрслээд амттанаар чимчхэд багачууд эцэг эхийнхээ халааснаас мөнгө гаргуулж л таараа.

15. ДОТООД ЗАСАЛ ЧИМЭГЛЭЛ

Жаахан гарын уртай, санаа нийлсэн хамтрагчтай, багажтай бол барилгын дотоод засал чимэглэл хийх ажил шинэ шинэ барилга орон сууц ашиглалтад орж байгаа өнөө цагт бас л эрэлт ихтэй ажлын нэг болоод байгаа. Баг бүрдүүлээд шинэ загвар, санаа гаргаад зар түгээхэд өрөө тасалгаагаа, албан өрөөгөө орчин үеийн интерьер дизайнаар засч тохижуулах, чамин тансаг болгох гэсэн хэрэглэгч, захиалагч мундахгүй.