Дэлхийн допингийн эсрэг байгууллага (WADA)-аас ОХУ-д оноогоод байсан дөрвөн жилийн хоригийг Спортын арбитрын шүүх хоёр жил болгон буурууллаа. Допингийн шинжилгээг удаа дараа будлиулсан Москвагийн лабораторийг WADA хэдэн жилийн турш шалгаад уг шийтгэлийг оноожээ.

Ингэснээр Орос улсын нэр, төрийн далбаа, сүлд дууллыг Токио-2020, Бээжин-2022 олимпт албан ёсоор хориглох юм. Эдгээр олимп, 2022 оны хөлбөмбөгийн ДАШТ-д Оросын тамирчид оролцохоор шалгарвал Спортын арбитрын шүүхээс нягталж байж эрхийг нь олгоно. Түүнчлэн 2022 оны арванхоёрдугаар сарын 16-ныг хүртэлх хугацаанд тус улсын нутаг дэвсгэрт дэлхийн түвшний ямар нэгэн уралдаан тэмцээн зохион байгуулахыг хориглосон бөгөөд хэрвээ урьд өмнө ийм эрх авсан тохиолдолд цуцлах аж.

Дээрх шийдвэрийн улмаас ОХУ-ын ерөнхийлөгч Владимир Путин, төр засгийн бусад төлөөлөгчид, спортын сайд Олег Матыцин нар Токио-2020, Бээжин-2022 олимп, дэлхийн АШТ-д очиж үзэхгүй болж байна. Харин тэдгээр наадам, тэмцээнийг зохион байгуулагч орны төрийн тэргүүн, ерөнхий сайд нь урьсан тохиолдолд тэд очиж болох юм.