УИХ-ын чуулганы хуралдаанаар Коронавируст халдвар (КОВИД-9)-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийг хэлэлцэх үеэр УИХ-ын гишүүн С.Ганбаатар Оюутолгой компани болон Монголын томоохон корпорацуудад нийгмийн хариуцлага байхгүй хэмээн шүүмжиллээ.

"Дөрөв дахин бага Эрдэнэт үйлдвэр 650 тэрбум төгрөг гаргаад байхад Оюутолгой нүдний булай болоод таг дуугүй байна. Тэд нийгмийн хариуцлагын хүрээнд вакцины мөнгө гаргуулах хэрэгтэй" гэсэн байр суурийг хэлсэн юм.

УИХ-ын гишүүн С.Ганбаатар: Энэ хуулийн 7.1.2 "Цар тахлын үед иргэдийн эрүүл мэнд, орлогыг хамгаалах, ажлын байрыг хадгалах, эдийн засгийг идэвхжүүлэх" гэсэн заалт орсон байна. Сангийн сайд гаднаас вакцины мөнгө гуйгаад яваад байна. Тэгэхээр вакцины асуудал дээр Монгол улсад үйл ажиллагаа явуулж байгаа томоохон ААН, үндэстэн дамнасан корпорацуудын нийгмийн хариуцлагыг дээшлүүлэх хэрэгтэй. Гуйлга гуйж байгаа явдал биш. Монгол улс байгаа учраас, Монголын ард түмэн байгаа учраас, Монголын баялаг байгаа учраас тэд ашиг хүртэж байгаа. Тиймээс энэ давагдашгүй хүчин зүйлийг ашиглаж Оюутолгойн хөрөнгө оруулалтын гэрээнд өөрчлөлт оруулаач ээ. 

7.1.2 дээр санхүүгийн хүндрэл байгаа учраас хэрэгжихгүй байна. Оюутолгойгоос 4 дахин бага Эрдэнэт үйлдвэр 650 тэрбум төгрөг гаргаад байхад Оюутолгой нүдний булай болоод таг дуугүй, алтаа 30 хувийн нэмүү өртөгтэйгөөр зараад сууж байна. Хүмүүс орлогогүй, мөнгөгүй болчхоод байна. гэлээ.