Өнөөдөр АН даргагүй үүрэг гүйцэтгэгчтэй байгаа бөгөөд даргын үүрэг гүйцэтгэгч Ц.Туваан нь АН-ын удирдаж байна. Өнгөрөгч намар АН-ын даргыг тодруулахаар сунгаа явуулсан ч тодорхойгүй шалтгаанаар шинэ даргыг сонгоогүй. Өөрөөр хэлбэл АН-ын даргагүй байлгах, нөгөө талдаа үүрэг гүйцэтгэгч өөрөө жинхэнэ дарга болох хүсэл эрмэлзлээс улбаалаад тус намын дотоод маргаан оргилдоо хүрлээ.

Энэ бол зөвхөн С.Эрдэнэ ба Ц.Туваан нарын бүлгүүдийн зөрчил юм шиг харагдах боловч цаагуураа Ардчилсан нам орших уу эс орших уу гэдэг тулаан болоод байна. Товчхондоо энэ өдрүүдэд өрнөж буй Ардчилсан нам доторх тэмцэл нь тус намын 30 жилийн үйл ажиллагааны үр дүн юм.

С.Эрдэнэ сонгуульд ялагдал хүлээсэн учраас алдаагаа үүрч намын даргын албан тушаалаасаа буусан.  Намаа сонгуульд ялагдуулсан АН-ын удирдлага хариуцлага хүлээгээд огцордог дүрэмтэй нь үнэн юм бол сүүлийн дөрвөн жил АН-ын багт ажиллан ЕНБД, дэд даргаар ажиллаж байсан Ц.Туваан ч мөн огцрох ёстой хүн. Гэвч тэр яагаад алдаагаа ухамсарлахгүй, хариуцлага хүлээхгүй байна вэ?

С.Эрдэнэ АН-ын даргын тамгыг Ц.Туваанд бүр биш түр өгсөн шүү гэдгийг дахин сануулья. Өөрөөр хэлбэл Ц.Туваан АН-ын даргын үүрэг гүйцэтгэгч буюу жинхэнэ дарга биш гэсэн үг. Гэвч сарын 18,19-ний өдрүүдэд АН-ын их хурал болж, намын дүрмэндээ өөрчлөлт оруулсан бөгөөд тухайн өөрчлөлтөө Улсын дээд шүүхэд хүргүүлээд байгаа билээ.

Энэ үеэр тус намын дарга асан С.Эрдэнэ “Улсын дээд шүүх улс төрийн намыг бүртгэдэг дүрэм журмын хүрээнд 2017 оны 01 тоот тогтоолоор албан ёсоор бүртгэлтэй  Ардчилсан намын дарга нь С.Эрдэнэ хэвээр байгаа” гэж мэдэгдсэн. Улмаар энэ сарын 28-ны өдөр Ардчилсан намын Хэрэг эрхлэх газрыг шинээр байгуулж,  АН-ын ҮБХ-ы гишүүн Н.Цэрэнбатыг даргаар томиллоо.

Ингэснээр Ардчилсан Нам албан ёсоор хагарч, С.Эрдэнэ, Ц.Туваан гэсэн хоёр өөр даргатай, "Шонхор тауер", "Бодь цамхаг" гэсэн хоёр өөр газар байртай, Н..Цэрэнбат, П.Нүрзэд гэсэн хоёр өөр дарга бүхий Хэрэг Эрхлэх Газартай, тусдаа үйл ажиллагаатай хоёр Ардчилсан Нам бий боллоо.

Ер нь бол АН-ын байнгын зовлон нь дарга цэргийн хэрүүлд оршиж ирснийг өөрсдөө хэлдэг. Үндэсний зөвлөлдөх хороо хуралдахаараа бодлого бус дарга, удирдлагаа огцруулах тухай ярьсаар байгаад дуусдаг. Бүлэг, фракцийн талцал, зодооноо АРДЧИЛАЛ хэмээн өөрсдөө тайлбарладаг. Одоо ч ийм л байгаа.

Ийм байдлаар цааш явбал тус нам  Ерөнхийлөгчийн сонгуульд  ямар ч  бэлтгэлгүй орж ялагдахаар  байгаа юм. Энэ бүхэн МАН-д л ашигтайгаар эргэнэ. Эв нэгдэлгүй, энэ тэнд хэрүүл жингэнэсэн АН дараа жилийн Ерөнхийлөгчийн сонгуульд ялагдвал 2024 оны УИХ-ын сонгуульд ялна гэж хэлэхэд хэцүү. Үүний дараа АН-д жинхэнэ мөхөл ирж, улс төрийн тавцангаас өөрийн эрхгүй арчигдаж мэдэх юм.