УИХ-ын 2020 оны сүүлийн хуралдаан өнөөдөр боллоо. Хуралдаанаар   Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төсөл -ийг хэлэлцсэн юм. Энэ үеэр зарим гишүүд өчигдөр болсон хандивын тоглолтыг шүүмжилсэн юм.

УИХ-ын гишүүн Н.Алтанхуяг: Өчигдөр орой Монгол даяар найр наадам болж, социалист реализмын маш том суртал нэвтрүүлэг явуулж хандив цуглууллаа.  Цар тахал нь хаачсан юм бэ. Гэтэл ард түмэн хандив цуглуулах нь бүү хэл өнөө маргаашаа яая гэж байна. Хаанаас, хэн ийм юм бодож олов. Бид хаашаа явж байгаагаа ярилцах цаг болсон байна. Юмыг магтан дуулдаг, болохгүй байгаагаа нухчин дардаг, дуу хоолойг нь боомилдог нийгэм рүү явж байна. Монголд юу болоод байна вэ. Өчигдөр бүр нүдний нулимс гарлаа. Миний Монгол ийм зам руу явах ч гэж дээ. Цар тахал, хоорондын зай барих, тэгж болохгүй, ингэж болохгүй гэдэг чинь хаана байна. Энд баталж байгаа хуулийн хэрэгжилт хаана байна. Соёлын яам гэж ийм яам байгуулах байсан юм бол шал дэмий дэмжсэн байна. Энэ яамыг өөр зорилгоор байгуулсан шүү дээ. Ард түмэн, аж ахуйн нэгжийнхээ байгаа байдлыг ойлгохгүй байгаа юм уу. Яаж ийм хачин юм хийж байна аа” хэмээн бухимдсан юм.