Өнөөдрийн ЭМЯ-ны КОВИД 19 цар тахлын мэдээллийн үеэр  БЗД-н нэгдсэн эмнэлэгт эмчлүүлж байсан иргэн, коронавирусийн халдвар авч улмаар на барсан тухай мэдээллээ. 

ХӨСҮТ-ийн Тандалт судалгааны албаны дарга А.Амбасэлмаа "2021 нэгдүгээр сарын 4-ний өдөр улсын хэмжээнд нийт 11,581 хүнд шинжилгээ хийхэд 22 хүнд халдвар илэрсэн. Бүгд Улаанбаатар хотод бүртгэгдсэн бөгөөд 12 нь БЗД-ийн нэгдсэн эмнэлгийн голомтод хамааралтай, бусад голомтуудын ойрын хавьтлаар тусгаарлагдсан хүмүүсийн нэг, хоёр, гурав дахь давтан шинжилгээгээр илэрсэн байна. Мөнххада компанитай холбоотой 17 тохиолдол болсон. Үүнээс 6 нь тус компанийн ажилтан бол 11 нь гэр бүлийн хүмүүс нь байгаа.  ХСҮТ-тэй холбоотой халдварын 16 тохиолдол бүртгэгдээд байна.

Өчигдөр буюу нэгдүгээр сарын 4-ний өдөр БЗД-н нэгдсэн эмнэлэгт зүрхний хэм алдалт, зүрхний архаг дутагдалтай архаг хууч өвчний улмаас хэвтэн эмчлүүлж байгаад коронавирусний халдвар авсан  76 настай эрэгтэй нас барлаа. Түүнийг халдвар авсан нь тогтоогдсоны дараа ХӨСҮТ-д хэвтүүлэн эмчилж байсан бөгөөд 5 хоног эмчлүүлж байгаад нас барлаа. 

Сүүлийн 24 цагийн дотор Сэлэнгэ, Дархан-Уул, Говьсүмбэр, Орхон, Архангай, Дорноговь аймгийн голомтоос батлагдсан тохиолдол бүртгэгдээгүй. Дотоодод бүртгэдсэн халдварыг танилцуулбал, Улаанбаатар хотод 491 тохиолдол, Орхон аймагт  25  тохиолдол,  Архангай аймагт 3  тохиолдол,  Сэлэнгэ аймагт 217  тохиолдол, Дархан-Уул аймагт 45  тохиолдол, Говьсүмбэр аймагт 4  тохиолдол,  Дорноговь аймагт 32 тохиолдол тус тус бүртгэгдээд байна. Ингээд улсын хэмжээнд халдварын батлагдсан тохиолдол 1,308 болсон бол үүнээс 884 хүн эдгэрсэн байна. Эмчлэгдэж байгаа 413 хүний биеийн байдлыг үнэлбэл, маш хүнд 3, хүнд 12, хүндэвтэр 126, хөнгөн 272 байна" гэлээ.