УИХ-ын нэр бүхий 54 гишүүн “Нөхөн олговор олгох тухай” нэртэй хуулийн төсөл өнөөдөр өргөн барьжээ. 1937 оны их хэлмэгдүүлэлтээр Монголын асар их өв соёл, лам нар, ард түмэн, улсаараа маш их хохирол амссан.

Гол нь энэ хэлмэгдүүлэлтийн үеэр монголчууд үнэт зүйл, өв соёл, оюун санааны хохирол нь өнөөг хүртэл үргэлжилсээр байна. МАН нэгэнтээ хэлмэгдэгсдийн үр хүүхэд, ар гэрийнхнээс уучлалт хүсч, төрийн нэрийн өмнөөс уучлалт гуйсан удаатай.

Сая хэдхэн хоногийн өмнө болсон МАН-ын Бага хурлын үеэр 100 жилийн ой тэмдэглэн өнгөрүүлэх хүрээнд Монголын төр засаг дахин албан ёсоор уучлалт хүсэх тухай яригджээ. УИХ-ын 2010 оны 48 дугаар тогтоолоор баталсан Үндэсний аюулгүй байдлыг үзэл баримтлалын 3.1.4.8-д “Уламжлалт Бурхны шашин соёлыг сэргээн хөгжүүлж, сүм хийдийн үйл ажиллагааг нийгмийн оюун санааг гэгээрүүлэх, үндэсний эв нэгдлийг бэхжүүлэх, ядуурлыг бууруулах, зовлон гамшигт нэрвэгдсэн хүн ардад туслалцаа үзүүлэх, байгаль орчныг хамгаалах үйлсэд чиглүүлэхэд төрөөс анхаарч, дэмжлэг үзүүлнэ”, 3.1.4.9-т “Монголын ард түмний олон зуун жилийн оюуны өвийг тээж, хадгалж ирсэн Монголын Бурхны шашны өв соёлын судалгааг төрөөс онцлон дэмжинэ” гэх мэт Үндсэн хуульд заасан хэд хэдэн заалтын хүрээнд УИХ-ын нэр бүхий 54 гишүүн Монголын өв соёл, биет болон биет бус өв соёлыг сэргээн хөгжүүлэх зорилгоор дээрх хуулийн төсөл өргөн барьсан бололтой.

Х.АНХЗУЛ