Холливудын алдарт жүжигчин, Буддын шашны шүтэн бишрэгч гэдгээрээ монголчуудад танигдсан Ричард Гир манай улсад 4 удаа айлчилж байжээ.

Ричард Гир өнгөрсөн 1996, 2010, 2014, 2017  онуудад Монгол Улсад ирж байсан.

1996, 2014 онуудад баримтат кино хийхээр манай улсад ирж байсан бөгөөд 2010 онд Ричард Гир Монголын бурхан шашинтны төв Гандантэгчинлэн хийдээс зохион байгуулж буй ‘Монголын бурхан шашин’ нэртэй олон улсын хэмжээний бага хуралд оролцож байсан юм.

Тухайн хуралд оролцож байх үеэрээ “Миний Монголд ирэх дуртай байдаг гол шалтгаан нь Монголын соёл уламжлал дахь бурхны шашны нөлөөтэй холбоотой. Шинжлэх ухаан өндөр хөгжсөн ч хүний сэтгэлийг судлах тал дээр мухардалд орсон. Энд буддын шашин хариулт өгч чадна. Энэ бол шинжлэх ухаанч шашин. Монголд байгалийн баялгаас илүү дотоод сэтгэлийн агуу их баялаг хүч байна” гэж илтгэлдээ онцолж байсан юм.

Үүний дараа 2017 онд Ричард Гир Монгол Улсад ирэхдээ “Төрийн ордон”-оор зочилж байсан. Тухайн үед бурхны шашин, тэр дундаа хэлмэгдүүлэлтийн үед эх орноос гарч явсан лам буцаж ирээд багшийнхаа шарилыг говиос хайдаг өгүүлэмжтэй кино хийхээр зорьж ирсэн хэмээн ойрын эх сурвалжууд мэдээлсэн байна. Энэ төсөл амжилттай цааш үргэлжилбэл кино зураг авалтын ихэнх хэсгийг манайд хийгдэнэ гэж мэдээлж байсан билээ.

Ричард Гир нь Далай ламын дотны найз. Түвдийн хүний эрхийн төлөө тэмцэгч, Түвдийг дэмждэг учраас  Далай ламтай адил тэрээр Хятадад очих эрх нь хасагдсан. Өдөр бүр бясалгал хийдэг, шашны зан үйлийг ёсчлон дагадаг нэгэн.

Буддын шашинтай Ричард Гир монголчуудад маш их элэгсэг ханддаг бөгөөд буддын шашны агуу соёлын өвийг тээсэн ард түмний хувьд буддын шашин соёлоо сэргээх ёстой, төр засаг хийгээд сүсэгтнүүд оюун санааны өв соёлоо сэргээх ажлууд хийгээсэй, өөрийн хувьд үргэлж дэмжинэ гэдгээ илэрхийлдэг билээ.