ОХУ дөрөвдүгээр сарын 1-нээс эхлэн Герман, Венесуэл, Шри-Ланка, Сири, Узбекистан, Тажикистан улсуудтай нислэгээ сэргээхээр болжээ.

Энэ талаар тус улсын коронавирустэй тэмцэх шуурхай штабаас мэдээлсэн бөгөөд ингэхдээ Москвагаас Дамаск, Душанбе, Ташкент, Коломбо хотууд руу долоо хоногт нэг удаа, Каракас хот руу хоёр удаа нислэг үйлдэхээр болсон байна. Мөн Герман руу Москва-Берлин-Москва чиглэлд долоо хоногт таван удаа, Москва-Майнын Франкфурт-Москва чиглэлд гурван удаа нислэг үйлдэх бол Санкт-Петербургээс Германы хотууд руу үйлдэх нислэгийг мөн ийм байдлаар зохион байгуулахаар болжээ.

Сануулахад, ОХУ коронавирусний цар тахлын улмаас 2020 оны гуравдугаар сарын 27-ноос эхлэн гадаадад байгаа иргэдээ татаж авах тусгай үүргийн нислэгээс бусад агаарын тээврийн бүх харилцаагаа түр зогсоох шийдвэрийг гаргаад байсан юм. Гэхдээ өнгөрсөн оны наймдугаар сараас бусад оронтой нислэгээ аажмаар сэргээж эхэлсэн бөгөөд одоогийн байдлаар Турк, Танзани, Швейцар, Египет, АНЭУ, Беларусь, Киргизстан, Казахстан, Серби, Өмнөд Солонгос, Япон, Этиоп, Финлянд, Вьетнам, Энэтхэг, Катар, Грек, Сингапур, Куба, Сейшелийн арал, Мальдив, мөн Азербайжан, Армен зэрэг улсууд руу нислэг үйлдэхийг зөвшөөрсөн байна. 

эх сурвалж: tass.com